काठमाडौं। राष्ट्रिय स्वतन्त्र पार्टी (रास्वपा) ले आफ्नो देशव्यापी संगठन सुदृढीकरण अभियान अन्तर्गत लुम्बिनी प्रदेशमा पहिलो जिल्ला अधिवेशनहरू सम्पन्न गर्दै नयाँ नेतृत्व चयन गरेको छ।

पार्टीको केन्द्रीय नीति अनुरूप तल्लो तहसम्म सांगठनिक संरचनालाई वैधानिकता दिने र नयाँ ऊर्जा थप्ने उद्देश्यका साथ लुम्बिनी प्रदेशका ११ वटा जिल्लाहरूमा नयाँ जिल्ला सभापतिहरू चयन गरिएको हो। विभिन्न जिल्लामा भएका लोकतान्त्रिक प्रतिस्पर्धा तथा आन्तरिक सहमति मार्फत पार्टीले युवा, व्यावसायिक र समावेशी अनुहारहरूलाई अगाडि सारेको छ।

रास्वपा लुम्बिनी प्रदेशले सार्वजनिक गरेको आधिकारिक विवरण अनुसार दाङ जिल्ला सभापतिमा किरण खनाल र नवलपरासी (बर्दघाट सुस्ता पश्चिम) को सभापतिमा डा. रवि पाण्डे निर्वाचित भएका छन्।

त्यसैगरी, अर्घाखाँची जिल्लाको नेतृत्व श्रीमती सीता पराजुलीले सम्हालेकी छन् भने रुपन्देहीको जिल्ला सभापतिमा महेन्द्र प्रसाद उपाध्याय चयन भएका छन्। रोल्पामा बालाराम थापा र कपिलवस्तुमा शिव सुवेदीले रास्वपाको कमान्ड सम्हाल्ने जिम्मेवारी पाएका छन्।

यसैगरी, पहाडी तथा तराईका अन्य जिल्लाहरूमा पनि नेतृत्व चयन प्रक्रिया सफलतापूर्वक सम्पन्न भएको छ।

जस अन्तर्गत गुल्मीको जिल्ला सभापतिमा हरि श्रेष्ठ, बाँकेमा विवेक श्रेष्ठ, र बर्दियामा श्रीमती शान्ता बुढा क्षेत्री निर्वाचित भएका छन्। पाल्पा जिल्लाको जिम्मेवारी विष्णु भण्डारीले पाएका छन् भने प्युठान जिल्लाको सभापतिमा विकास पोख्रेल भारी जनसमर्थनका साथ चुनिएका छन्।

लुम्बिनी प्रदेशका लगभग सबै जिल्लाहरूमा नयाँ कार्यसमिति र नेतृत्व स्थापित भएसँगै रास्वपाले यस क्षेत्रमा आफ्नो राजनीतिक तथा सामाजिक गतिविधिलाई थप तीव्र बनाउने संकेत गरेको छ।

नयाँ निर्वाचित नेतृत्वमा महिला र युवाहरूको उल्लेख्य सहभागिता रहेकाले यसले आगामी स्थानीय तथा आम निर्वाचनका लागि पार्टीको जग बलियो बनाउने रास्वपा लुम्बिनी प्रदेश समितिले विश्वास व्यक्त गरेको छ। नवगठित कार्यसमितिहरूले चाँडै नै आफ्नो जिल्लाभित्रका पालिका र वडा तहका समितिहरूलाई पनि पूर्णता दिने गृहकार्य सुरु गरिसकेका छन्।