काठमाडौं । इरानी विदेश मन्त्रालयले अमेरिकी राष्ट्रपति डोनाल्ड ट्रम्पको दोहामा इरानसँग भेटवार्ता गर्ने दाबीलाई अस्वीकार गरेको छ।

बीबीसी फारसी सेवाका अनुसार, इरानको विदेश मन्त्रालयका प्रवक्ता इस्माइल बकाईले आगामी दिनहरूमा इरानले “अमेरिकी पक्षसँग कुनै पनि स्तरमा वार्ता बैठक गर्ने छैन” भने।

उनले अमेरिकी प्रतिनिधिको कतार भ्रमणको इरानी प्रतिनिधिमण्डलको भ्रमणसँग कुनै सम्बन्ध नभएकोमा जोड दिए।

बीबीसी फारसी सेवाका अनुसार इरानका उपविदेशमन्त्री तथा प्राविधिक वार्ता टोलीका प्रमुख काजेम घरिबाबादीले पनि यस हप्ता त्यस्तो कुनै बैठकको योजना नभएको बताएका छन्।

इरानको अनुरोधमा, अमेरिकी र इरानी प्रतिनिधिहरू जुन ३०, मंगलबार दोहामा भेट्ने अमेरिकी राष्ट्रपति डोनाल्ड ट्रम्पले दाबी गरेपछि इरानी अधिकारीहरूले यी बयान दिएका हुन्।

ह्वाइट हाउसकी प्रेस सचिव क्यारोलिन लेभिटले ट्रम्पका डेपुटीहरू स्टिभ विटकफ र जारेड कुशनर बैठकमा उपस्थित हुने बताइन्।