काठमाडौं । अमेरिकाबाट डिपोर्ट (निष्कासित) गरी हालै स्वदेश फर्काइएका १०० भन्दा बढी भेनेजुएली नागरिकहरू विनाशकारी भूकम्पका कारण एउटा होटल भत्किँदा त्यसमा पुरिएर बेपत्ता भएका छन्।

गत बुधबार अमेरिकाको मियामीबाट १४६ जना भेनेजुएली नागरिक बोकेको डिपोर्टेसन उडान भेनेजुएला अवतरण गरेको थियो। विमानबाट ओर्लिएका उनीहरूलाई आवश्यक स्वास्थ्य परीक्षण र कागजी प्रक्रियाका लागि तटीय सहर ला गुएरास्थित ‘होटल सान्टुआरिओ ला लानाडा’ मा राखिएको केही घण्टामै ७.२ र ७.५ म्याग्निच्युडको शक्तिशाली जुम्ल्याहा भूकम्प गएको थियो।

भूकम्पको कडा धक्काका कारण उक्त होटल पूर्ण रूपमा ध्वस्त हुँदा त्यहाँ बसिरहेका १०० भन्दा बढी नागरिक भग्नावशेषभित्र हराइरहेका छन्। भूकम्पमा परि हालसम्म १,७१९ भन्दा बढी मानिसको मृत्यु भइसकेको छ भने समग्र देशैभरि ५१,००० भन्दा बढी मानिसहरू बेपत्ता रहेको स्वतन्त्र डिजिटल डेटाबेस र आधिकारिक विवरणहरूले देखाएका छन्।

मोबाइल नेटवर्क र सञ्चार सेवा पूर्ण रूपमा ठप्प भएकाले बेपत्ताको संख्या यति धेरै देखिएको र यसमा कतिपय नामहरू दोहोरिएको हुन सक्ने अनुमान गरिए तापनि ७२ घण्टाको महत्त्वपूर्ण ‘उद्धार विन्डो’ समाप्त भइसकेकाले भग्नावशेषमा पुरिएकाहरूलाई जीवितै भेट्ने सम्भावना निकै कम हुँदै गएको छ।

त्यस ध्वस्त होटलको भग्नावशेषबाट कुनै तरिकाले जीवितै उम्किन सफल भएकी ५८ वर्षीया लिस्बेथ पोर्टिलोले रुँदै भनिन्, “म होटलको दोस्रो तलामा १६ जना अन्य महिलाहरूसँग कोठामा थिएँ। अचानक जमिन हल्लिन थाल्यो र ठूला कङ्क्रिटका पिलरहरू हाम्रै अगाडि खस्न थाले। म एकछिन त बिममुनि पुरिएँ, तर भूकम्पको दोस्रो कडा धक्काले भग्नावशेषलाई यसरी हल्लायो कि म बाहिर निस्कन सफल भएँ।”

पोर्टिलोका अनुसार उनीसँगै करिब २० जना मात्रै होटलबाट बाहिर आउन सकेका थिए भने बाँकी सबै साथीहरू भग्नावशेषभित्रै चिच्याइरहेका थिए। त्यस्तै अर्की २४ वर्षीया जेनी रोड्रिगेजले पनि भग्नावशेषबाट आफ्नो एउटा हात मात्र बाहिर निकाल्न सफल भई त्यहीँबाट गुज्रिरहेका एक साथीको सुरुवाल समातेर मद्दत मागेपछि आफ्नो ज्यान जोगिएको अनुभव सुनाएकी छिन्।

हाल २४ वटा देशका २,७०० भन्दा बढी विशेष उद्धारकर्मी र तालिमप्राप्त कुकुरहरूको टोलीले ला गुएरा र राजधानी काराकासका विभिन्न क्षेत्रमा उत्खनन र खोजी कार्य जारी राखेका छन्। तर, सोमबार बिहान मात्र पुनः आएको ४.६ म्याग्निच्युडको कडा पराकम्प र सरकारको सुस्त व्यवस्थापनका कारण पीडित परिवार र आफन्तहरू यतिबेला गम्भीर आक्रोश र शोकमा रहेका छन्।