काठमाडौं । पाकिस्तानको बलुचिस्तान र खैबर पख्तुनख्वाको सीमामा अवस्थित दाना सार क्षेत्रमा बस दुर्घटना हुँदा कम्तीमा ४० जनाको मृत्यु भएको छ।

बलुचिस्तानका अधिकारीहरूले शेरानी जिल्लामा यात्रुवाहक बस दुर्घटना भएको बताएका छन्। क्वेटास्थित उद्धार ११२२ का प्रवक्ताले बस क्वेटाबाट पेशावर जाँदै गरेको बताएका छन्।

बलुचिस्तानका मुख्यमन्त्रीका सहायक शाहिद रिन्दले दुर्घटनामा ४० जनाको मृत्यु भएको पुष्टि गरे र आठ यात्रु घाइते भएको बताए।

उनले भने – प्रारम्भिक जानकारीमा दुर्घटनाग्रस्त बसले आफ्नै यात्रुहरू बाहेक अर्को बिग्रिएको बसबाट पनि यात्रुहरू बोकेको देखिएको छ।

स्थानीय अधिकारीहरूका अनुसार बस गहिरो खोंचमा खसेको थियो जसले गर्दा यात्रुहरूसम्म पुग्न र उद्धार गर्न गाह्रो भएको थियो।

दुर्घटना स्थलका तस्बिरहरूले बस पूर्ण रूपमा ध्वस्त भएको देखाउँछन्।