काठमाडौं। अस्ट्रेलियाका प्रधानमन्त्री स्कट मोरिसनले १६ वर्षभन्दा माथिको उमेर समूहका ८० प्रतिशत नागरिकहरुले पूर्ण खोप लगाइसकेका अस्ट्रेलियाका राज्यहरुले अन्तर्राष्ट्रिय आवागमन खुल्ला गर्न सक्ने घोषणा गरेका छन् । यही महिना अस्ट्रेलियाले १ करोडभन्दा बढी डोज कोरोनाभाइरस खोप पाउनेगरी सम्झौता भएको जानकारी दिने क्रममा प्रधानमन्त्री मोरिसनले यस्तो बताएका हुन् ।

प्रधानमन्त्री मोरिसनका अनुसार बेलायतसँग भ्याक्सिन साटासाट गर्ने सम्झौताअनुसार अस्ट्रेलियाले यही महिना ४० लाख डोज फाइजर भ्याक्सिन पाउनेछ । यही हप्ताको सुरुवातमा सिंगापुरसँग भएको सम्झौता अनुसार ५ लाख डोज खोप पनि आउनेछ । सिड्नी मर्निङ हेराल्डका अनुसार प्रधानमन्त्रीले बेलायतसँग भएको सम्झौताका कारण सेप्टेम्बर महिनामा अस्ट्रेलियामा उपलब्ध हुने फाइजर खोपको डोज दोब्बर वृद्धि भएको बताएका छन् ।

विभिन्न सम्झौतामार्फत सेप्टेम्बर महिनाभरीमा अस्ट्रेलियाले ९० लाख डोज फाइजर भ्याक्सिन र १० लाख डोज मोडर्ना भ्याक्सिन पाउनेछ । यसबाहेक एस्ट्राजेनेकाले गर्ने आपूर्ति पनि निरन्तर रहनेछ । ‘हामीले उपलब्ध फाइजर डोज दोब्बर बनाएका छौं । यसको पहिलो खेप लिएर विमान भोलि उड्दैछ । केही हप्तामा यी सबै डोज आउनेछन्’ प्रधानमन्त्री मोरिसनले भने ।

अस्ट्रेलियाले अहिलेसम्म आफ्नो देशमा २ करोड ३ लाखभन्दा धेरै डोज खोप दिइसकेको छ । अहिले पनि खोप अभियान जारी छ र अहिले एक हप्तामा करिब १८ लाख डोजको दरले खोप दिने काम भइरहेको छ । स्वास्थ्य मन्त्री ग्रेग हन्टका अनुसार अस्ट्रेलिया १६ वर्षभन्दा माथिका ७० प्रतिशत मानिसहरुलाई कम्तीमा एक डोज दिने लक्ष्यसम्म पुग्न करिब २० लाख डोज मात्र पछि छ । जसको अर्थ आगामी एक हप्तामा उसले यो लक्ष्य हासिल गर्न सक्छ । अस्ट्रेलियाले आफ्नो देशका ४९ प्रतिशत जनतालाई कम्तीमा १ डोज खोप दिइसकेको छ र २९ प्रतिशत जनताले पूर्ण खोप पाइसकेका छन् ।

यद्यपि अन्तर्राष्ट्रिय सीमा खुल्नका लागि भने यो उमेर समूहका ८० प्रतिशत मानिसहरुले दुवै डोज खोप लगाइसक्नुपर्छ । यो लक्ष्यसम्म पुग्न भने केही महिना लाग्न सक्छ । ‘मलाई यत्ति थाहा छ हामीले जुन दरमा खोप दिइरहेका छौं त्यसबाट हामी त्यो दिनको नजिक पुगिरहेका छौं’ प्रधानमन्त्री मोरिसनले भने ‘एकै दिनमा जादु हुँदैन, एकै दिनमा स्वास्थ्य सुरक्षा हुन सक्दैन । सुरक्षा त्यतिबेला हुन्छ जब हामी समुदायमा खोप अभियानको निश्चित चरणमा पुग्छौं ।’