काठमाडौं । अमेरिका-इरान आणविक सम्झौताका लागि शनिबार हुने भनिएको चौथो चरणको वार्ता हाललाई स्थगित गरिएको छ।

दुई देशबीचको वार्तामा मध्यस्थता गरिरहेका ओमानी विदेशमन्त्री बद्र अल्बुसैदीले यो जानकारी दिएका हुन्। उनले एक्समा पोस्ट गरे – मे ३ शनिबारका लागि तय भएको अमेरिका-इरान बैठक स्थगित गरिएको छ।

उनले लेखेका छन् – बैठकको अर्को मिति दुवै देशको आपसी सहमतिमा घोषणा गरिनेछ।

ओमानी विदेशमन्त्रीको पोस्टको बारेमा बीबीसी फारसीले सोधेको प्रश्नको जवाफ दिँदै अमेरिकी विदेश विभागका प्रवक्ता ट्यामी ब्रुसले भने: “चौथो चरणको वार्तामा अमेरिकाको सहभागिताको समय र स्थान कहिल्यै निर्धारण गरिएको थिएन।”

ब्रुसले थपे: “तर म तपाईंलाई भन्न सक्छु कि हाम्रा प्रतिनिधिहरूले वार्तामा भनेको कुराको आधारमा, मलाई शंका छ कि निकट भविष्यमा केहि हुनेछ, र हामीसँग विवरणहरू हुने बित्तिकै हामी जानकारी गराउनेछौं।”

यसैबीच, अमेरिकी राष्ट्रपति डोनाल्ड ट्रम्पले विश्वका सबै देशहरूलाई इरानबाट तेल किन्न बन्द गर्न वा थप अमेरिकी प्रतिबन्धहरूको सामना गर्न तयार रहन चेतावनी दिएका छन् ।

चौथो चरणको वार्ता स्थगित भएको खबर यस्तो समयमा आएको छ जब अमेरिकी रक्षा सचिव पिट हेगसेथले बुधबार इरानलाई ‘हुथीहरूलाई समर्थन गरेकोमा मूल्य चुकाउन’ चेतावनी दिएका थिए।