काठमाडौं । बंगलादेश क्रिकेट बोर्ड (बीसीबी) ले आफ्नो क्रिकेट टोलीले २०२६ मा हुने टी-२० विश्वकप खेल्न भारतको भ्रमण नगर्ने निर्णय गरेको छ। बीसीबीले यस सम्बन्धमा अन्तर्राष्ट्रिय क्रिकेट परिषद् (आईसीसी) लाई इमेल मार्फत सन्देश पठाउनेछ।

विश्कपमा नेपाल र बंगलादेश एउटै समूहमा छन् । समूह सी मा रहेका यी टिमले एक आपसमा १७ फेब्रुअरीमा खेल्ने तालिका थियो । बंगलादेश भारत नआउने भएपछि यो खेल प्रभावित हुनेछ । अब नेपाल र बंगलादेशको खेल श्रीलंकामा सारिने अपेक्षा गरिएको छ ।

बंगलादेश क्रिकेट बोर्डले पनि आइसीसीलाई स्थल परिवर्तनको लागि अपिल गर्नेछ ताकि बंगलादेशका खेलहरू श्रीलंकामा आयोजना गर्न सकियोस्। पाकिस्तानले पहिले नै आफ्ना सबै खेलहरू श्रीलंकामा खेल्नेछ।

आइतबार दिउँसो बंगलादेश क्रिकेट बोर्डका १७ निर्देशकहरूको बोर्ड बैठकमा यो निर्णय गरिएको हो। बंगलादेश क्रिकेट बोर्डका निर्देशक नजमुल अबेदिन फहिमले यस विषयमा बीसीबीले पछि विस्तृत वक्तव्य जारी गर्ने बताए।

भारत र श्रीलंकाले २०२६ को आईसीसी टी-२० विश्वकप संयुक्त रूपमा आयोजना गर्दैछन्। यो प्रतियोगिता फेब्रुअरी ७ मा सुरु हुने तालिका छ। बंगलादेशको पहिलो खेल उद्घाटन दिन कोलकातामा वेस्ट इन्डिजसँग हुने तय थियो ।

यसअघि, बंगलादेशको अन्तरिम सरकारका धेरै सल्लाहकारहरू र खेलकुद आयोजकहरूले कथित धार्मिक र राजनीतिक दबाबका कारण मुस्ताफिजुर रहमानलाई आईपीएल टोली कोलकाता नाइट राइडर्सबाट निष्कासन गरिएकोमा कडा प्रतिक्रिया जनाएका थिए।

युवा तथा खेलकुद मामिला सल्लाहकार आसिफ नजरुलले भनेका थिए, “बंगलादेशी क्रिकेटर र देशको अपमान कुनै पनि हालतमा सहन सकिँदैन ।”

बंगलादेशका फास्ट बलर मुस्ताफिजुर रहमानलाई आईपीएल २०२६ बाट बहिष्कार गर्ने भारतीय क्रिकेट नियन्त्रण बोर्ड (बीसीसीआई) को निर्णयको कडा निन्दा गर्दै उनले भने, “हामी कुनै पनि परिस्थितिमा बंगलादेशी क्रिकेट, क्रिकेटर र बंगलादेशको अपमान सहन गर्दैनौं। दासत्वका दिन सकिएका छन्।”

आफ्नो प्रमाणित फेसबुक पेजमा पोस्ट गरिएको एक विज्ञप्तिमा आसिफ नजरुलले आरोप लगाएका थिए, “चरमपन्थी साम्प्रदायिक समूहहरूको दबाबमा बीसीसीआईले कोलकाता नाइट राइडर्स (केकेआर) लाई मुस्ताफिजुर रहमानलाई टोलीबाट हटाउन आदेश दियो।” उनले बंगलादेश क्रिकेट बोर्डलाई सम्पूर्ण मामिला आईसीसीलाई बुझाउन र लेख्न आग्रह गरे।

आसिफ नजरुलले आफ्नो पोस्टमा लेखेका छन्, “बोर्डले यो स्पष्ट पार्नु पर्छ कि जब एक बंगलादेशी क्रिकेटर सम्झौता हुँदाहुँदै पनि भारतमा खेल्न सक्दैन, तब सम्पूर्ण बंगलादेश क्रिकेट टोली विश्वकप खेल्न भारत जान सुरक्षित महसुस गर्न सक्दैन।”

यसका साथै उनले बंगलादेशमा आईपीएलको प्रसारण रोक्न पहल गर्न सूचना तथा प्रसारण सल्लाहकारलाई अनुरोध गरेका छन्।

बीसीसीआईको आदेशका कारण केकेआरले मुस्ताफिजुर रहमानलाई रिलिज गर्नुपरेको छ। यद्यपि, डिसेम्बर १६ मा अबुधाबीमा भएको लिलामीमा फ्रान्चाइजले बंगलादेशी तीब्र गतिका बलरलाई ९.२ करोडमा खरिद गरेको थियो।

यस विषयमा प्रतिक्रिया दिँदै मुस्ताफिजुर रहमानले भनेका थिए, “यदि उनीहरूले मलाई रिलिज गरे भने म के नै गर्न सक्छु र ?”

बंगलादेश क्रिकेट बोर्ड बाहेक बंगलादेश फुटबल महासंघका अध्यक्ष तबिश अवलले पनि मुस्ताफिजुरलाई आईपीएलबाट बाहिर राखिएकोमा गहिरो निराशा व्यक्त गरेका छन्।

उनले भने – कोलकाता नाइट राइडर्सले मुस्ताफिजुर रहमानलाई उनको क्रिकेट क्षमताको आधारमा छनोट गरेको थियो, तर “राजनीतिक हस्तक्षेपका कारण उनलाई प्रतियोगिताबाट हटाइयो, जुन धेरै दुर्भाग्यपूर्ण छ।”

उनले भने – खेलकुदमा मानिसहरूलाई एकसाथ ल्याउने र खाडलहरू कम गर्ने असाधारण शक्ति हुन्छ। खेलकुदलाई विभाजन सिर्जना गर्न होइन, पारस्परिक समझदारी र सम्मान निर्माण गर्न प्रयोग गर्नुपर्छ।