काठमाडौं । यस पटकको टि–२० विश्वकपमा लगातार २ सुपर ओभर भएका छन् । दक्षिण अफ्रिका र अफगानिस्तानबीचको खेल पहिलो सुपर ओभरमा पनि बराबरी भएपछि दोस्रो सुपर ओभर खेल्नुपर्ने भएको हो । सुपर ओभर १७ रनको बराबरी स्कोरमा सकिएको हो ।

दक्षिण अफ्रिका र अफगानिस्तानबीचको खेल निर्धारित २० ओभरमा बराबरी भएपछि सुपर ओभर खेलिएको हो ।

१८८ रनको लक्ष्य पच्छ्याएको अफगानिस्तानलाई अन्तिम ओभरमा १३ रन चाहिएको थियो, अन्तिम विकेट बाँकी थियो । अन्तिम ओभरको पहिलो बलमा नुर अहमदको सट क्याच भएको थियो । तर, कागिसो रबाडाले बल फाल्ने क्रममा रेखा नाघेपछि यो बल नो बल भयो ।

यो ओभरमा नूर अहमदले एउटा छक्का समेत हाने । अन्तिम ३ बलमा अफगानिस्तानलाई केवल २ रन चाहिएको थियो । तर, दुई रन लिन खोज्दा फजलहब फारुकी रनआउट भएपछि खेल बराबरी भएको हो ।