कास्की। ‘प्रधानमन्त्री कप’ राष्ट्रिय क्रिकेट प्रतियोगिताका लागि गण्डकी प्रदेशस्तरीय पुरुष एकदिवसीय क्रिकेट छनोट प्रतियोगिता बिहीबारदेखि पोखरामा सुरु हुने भएको छ।

गण्डकी प्रादेशिक क्रिकेट सङ्घको आयोजनामा हुने उक्त प्रतियोगिता आगामी चैत ३ गतेसम्म पोखरा रङ्गशालाको क्रिकेट मैदान र लेखनाथस्थित इडन हेभेन क्रिकेट मैदानमा सञ्चालन हुनेछ।

प्रतियोगिताको उद्घाटन खेल पोखरा रङ्गशाला क्रिकेट मैदानमा हुनेछ। उद्घाटन खेलमा बागलुङ र कास्की भिड्नेछन्। प्रतियोगितामा कास्की, स्याङ्जा, बागलुङ, तनहुँ, नवलपुर र पर्वत गरी गण्डकी प्रदेशका छ जिल्लाकाबीच प्रतिस्पर्धा हुने गण्डकी प्रादेशिक क्रिकेट सङ्घका अध्यक्ष सञ्जयकान्त सिग्देलले बताए।

प्रतियोगितामा खेलाडीले गरेको प्रदर्शनका आधारमा उत्कृष्ट २४ जना खेलाडी छनोट गरी उनीहरूलाई बन्द प्रशिक्षणमा सहभागी गराइनेछ। प्रशिक्षण चैत ४ देखि ७ गतेसम्म पोखरा रङ्गशाला क्रिकेट मैदानमा सञ्चालन हुनेछ। खेलाडीहरूको फिटनेस परीक्षण तथा अभ्यास खेलका आधारमा पिएम कप राष्ट्रिय क्रिकेट प्रतियोगिताका लागि गण्डकी प्रदेशको टोली छनोट गरिनेछ।

छनोट भएका खेलाडीहरुको क्षमता मूल्याङ्कन तथा राष्ट्रियस्तरको प्रतियोगितामा मानसिक रुपमा तयार गर्न गण्डकी प्रदेशका दुई प्रसिद्ध धार्मिकस्थल ‘मुक्तिनाथ’ र ‘त्रिवेणी’ दुई टोली गठन गरी तीन वटा अभ्यास खेल खेलाइने आयोजकले जनाएको छ।

सङ्घका अध्यक्ष सिग्देलले प्रदेशमा क्रिकेटको विकास र प्रतिभाशाली खेलाडी पहिचान गर्न छनोट प्रतियोगिता महत्वपूर्ण हुने बताए। “गण्डकी प्रदेशमा क्रिकेट खेल विकास तथा ग्रासरुट क्रिकेट विकासका लागि छनोट प्रक्रिया महत्वपूर्ण कोशेढुङ्गा हुने विश्वास लिएका छौँ”, सिग्देलले भने।