हेटौंडा । बागमती प्रदेश सरकारको आर्थिक वर्ष २०८३/०८४ को नीति तथा कार्यक्रम आज सार्वजनिक गरिने भएको छ । प्रदेश प्रमुख दिपक देवकोटाले प्रदेशसभा बैठकमा सरकारको आगामी आर्थिक वर्षको नीति तथा कार्यक्रम प्रस्तुत गर्ने कार्यक्रम रहेको छ ।

प्रदेशसभा सचिवालयका अनुसार आज साँझ ५ बजे बस्ने प्रदेशसभा बैठकमा प्रदेश प्रमुख देवकोटाले प्रदेश सरकारको तर्फबाट नीति तथा कार्यक्रम प्रस्तुत गर्नेछन् । नीति तथा कार्यक्रम प्रस्तुत गरिने विशेष बैठकका लागि प्रदेशसभा सदस्यहरूलाई बैठक प्रारम्भ हुनुभन्दा १५ मिनेटअघि नै औपचारिक पोशाकमा उपस्थित हुन अनुरोध गरिएको छ ।

यसअघि मंगलबार अपराह्न बसेको बागमती प्रदेश सरकारको मन्त्रिपरिषद् बैठकले आर्थिक वर्ष २०८३/०८४ को नीति तथा कार्यक्रम स्वीकृत गरेको थियो । मन्त्रिपरिषद्बाट पारित भएपछि उक्त नीति तथा कार्यक्रम प्रदेश प्रमुखमार्फत प्रदेशसभामा प्रस्तुत गर्न लागिएको हो ।

प्रदेश सरकारको आगामी वर्षको नीति तथा कार्यक्रममा पूर्वाधार विकास, कृषि, पर्यटन, शिक्षा, स्वास्थ्य, रोजगार सिर्जना तथा सुशासनलाई प्राथमिकतामा राखिएको अपेक्षा गरिएको छ । नीति तथा कार्यक्रम सार्वजनिक भएपछि त्यसमाथि प्रदेशसभामा छलफल हुने र त्यसका आधारमा आगामी आर्थिक वर्षको बजेट निर्माण प्रक्रिया अघि बढ्नेछ ।

बागमती प्रदेश सरकारको आगामी वर्षको विकास रणनीति, प्राथमिकता तथा कार्यक्रमहरूको मार्ग निर्देशक दस्ताबेजका रूपमा रहने नीति तथा कार्यक्रमप्रति प्रदेशसभा सदस्य, राजनीतिक दल तथा सरोकारवाला निकायको विशेष चासो रहेको छ ।