काठमाडौं । राष्ट्रिय प्रजातन्त्र पार्टी (राप्रपा)का वरिष्ठ नेता ज्ञानबहादुर (ज्ञानेन्द्र) शाहीले ‘नयाँ नेपाल’ र ‘भ्रष्टाचार नियन्त्रण’को नारा दिएर नेतृत्वमा पुगेका दलहरूका कारण देश पछाडि धकेलिएको आरोप लगाएका छन्।

नेता शाहीले विगतको सशस्त्र द्वन्द्व र पछिल्ला राजनीतिक घटनाक्रमप्रति कडा टिप्पणी गर्दै जनजीविका र सुशासनको नाममा जनतालाई केवल निराशा मात्र हात लागेको बताए।

‘एउटाले ‘नयाँ नेपाल बनाउँछु’ भन्यो- १७ हजार मान्छे मरे, १० वर्ष देश द्वन्द्वमा धकेलियो र भौतिक संरचना ध्वस्त भए। आज ८० लाखभन्दा बढी नेपाली विदेशमा पसिना बगाउन बाध्य छन्,’ शाहीले भने, ‘अर्काले ‘भ्रष्टाचारीलाई जेल हाल्छु र संविधान संशोधन गर्छु’ भन्यो, ७६ जना युवाको ज्यान गयो, देश खरानी भयो।’

उनले विगतमा गरिएका बाचा पूरा नभएको दाबी गर्दै थपे, ‘न भ्रष्टाचारी जेल परे, न त संविधान संशोधन नै भयो। बरु भ्रष्टाचारीहरू र ‘कारबाही गर्छु’ भन्दै देशलाई घाटा पुर्‍याउनेहरू आज शीतल निवासमा एउटै टेबलमा बसेर सत्ताको मजा लिइरहेका छन्। सत्य तीतो हुन्छ, तर यथार्थ यही हो।’