काठमाडौं । सर्बियाको राजधानी बेलग्रेडमा बुधबार राति इजरायली दूतावासमा आक्रमणको प्रयास भएको छ। दुई वटा चक्कु बोकेर पुगेका एक नाबालिगले दूतावासको सुरक्षामा तैनाथ प्रहरी जवानमाथि आक्रमण गरेका थिए।

प्रहरीले आत्मरक्षाका लागि चलाएको गोली लागेर आक्रमणकारीको घटनास्थलमै मृत्यु भएको छ। उक्त आक्रमणमा प्रहरी जवानको अनुहारमा सामान्य चोट लागेको छ।

सर्बियाका गृहमन्त्री इभिका दाचिचका अनुसार प्रहरीले यस घटनालाई आतङ्ककारी हमला मानेर अनुसन्धान अगाडि बढाएको छ। आक्रमणकारीले प्रहरीमाथि प्रहार गर्दा ‘अल्लाहु अकबर’ को नारा लगाएका थिए।

घटनालगत्तै देशमा आतङ्ककारी खतराको अलर्ट बढाएर उच्च स्तरमा पुर्‍याइएको छ भने संवेदनशील तथा महत्त्वपूर्ण स्थानहरूमा प्रहरीको तैनाथी कडा पारिएको छ।

गृहमन्त्रीका अनुसार आक्रमणकारी पश्चिमी सर्बियाको शाबात्स सहरका बासिन्दा रहेको अनुमान गरिएको छ। सुरक्षा निकायहरूले उनीमाथि पहिलेदेखि नै सूक्ष्म निगरानी राखिरहेका थिए।

दाचिचले ती नाबालिग ‘इस्लामिक स्टेट’ का समर्थक रहेको र उनले आफ्नो इन्स्टाग्राम खातामा उक्त सङ्गठनको समर्थनमा कालो झण्डा राखेको दाबी गरे।

घटनालगत्तै प्रहरीले दूतावास वरपरको सम्पूर्ण क्षेत्रलाई घेराबन्दी गरेको छ। घटनास्थलका तस्बिरहरूमा दूतावासबाहिरको सुरक्षा चौकी र आसपासका क्षेत्रमा अत्याधुनिक हतियारसहित प्रहरी जवानहरू तैनाथ रहेको देखिएको छ।

यसअघि जुन २०२४ मा पनि बेलग्रेडस्थित इजरायली दूतावासको सुरक्षामा खटिएका एक सर्बियाली प्रहरी जवानमाथि ‘क्रसबो’ (धनुषजस्तै हतियार) बाट आक्रमण गरिएको थियो। त्यस आक्रमणमा प्रहरी जवान घाइते भएका थिए भने जवाफी कारबाहीमा आक्रमणकारी मारिएका थिए।

इजरायली दूतावास बेलग्रेडको एक प्रतिष्ठित (पोश) क्षेत्रमा अवस्थित छ, जसको नजिकै अमेरिकी दूतावास पनि रहेको छ। त्यहाँ सुरक्षाका लागि विशेष प्रहरी टोली तैनाथ रहन्छ, जसका जवानहरू स्वचालित हतियारले सुसज्जित हुन्छन्। सर्बियाको इजरायलसँग निकट कूटनीतिक सम्बन्ध रहँदै आएको छ।

यो घटना सर्बियामा आइतबार सम्पन्न संसदीय निर्वाचन र इजरायलमा मङ्गलबार भएको आम निर्वाचनको लगत्तै भएको हो। सर्बियामा हाल नयाँ सरकार गठन हुन बाँकी नै रहेको छ।