काठमाडौं । नवौं गैर आवासीय नेपाली विश्व सम्मेलन तथा गैर आवासीय नेपाली संघ एनआरएनएको अन्तर्राष्ट्रिय महाधिवेशन आजबाट सुरु हुँदै छ ।नेपाल सरकार, नेपाल उद्योग वाणिज्य महासंघ र गैर आवासीय नेपाली संघको संयुक्त आयोजनामा नवौं विश्व सम्मेलन हुन लागेको हो ।

गैर आवासीय नेपालीको नवौं विश्व सम्मेलन आज दिउँसो राष्ट्रिपति विद्यादेवी भण्डारीले औपचारिक उद्घाटन गर्दैछन् भने सम्मेलनको समापन कार्यक्रममा भने प्रधानमन्त्री केपी शर्मा ओली सहभागी हुने कार्यक्रम रहेको छ ।

नेपालीका लागि नेपाली अभियान चलाउँदै आएको एनआरएनएले नवौं विश्व सम्मेलनको मूल विषय “म, मेरो एनआरएनए, र मेरो नेपाल” बनाएको छ।नवौं सम्मेलनले संघको नयाँ नेतृत्व चयन गर्नेछ । सो सम्मेलनमा ८१ मुलुकका गैरआवासीय नेपाली प्रतिनिधि, स्वेदशी तथा विदेशी गरी दुई हजार पाँच सयको सहभागी हुनेछन् ।

संघको नयाँ नेतृत्वका लागि बर्तमान उपाध्यक्ष कुमार पन्त र कुल आचार्यले आ-आफ्नो प्यानल नै बनाएर चुनावी मैदानमा होमिएका छन्।एनआरएनएमा प्रजातान्त्रिक समुह भनेर चिनिएको आचार्य समुहमा उपाध्यक्षहरुमा रविना थापा अमेरिका, डा. केशव पौडेल अमेरिका, नरेन्द्र भाट कतार र मन केसी अष्ट्रेलिया, रहेका छन् । यस्तै महासचिवमा जानकी गुरुङ र कोषाध्यक्षमा सोम सापकोटा उम्मेद्वार हुने पक्का भएको छ।

“आचार्य समुहमा उपाध्यक्षहरुमा रविना थापा अमेरिका, डा. केशव पौडेल अमेरिका, नरेन्द्र भाट कतार र मन केसी अष्ट्रेलिया, रहेका छन् । यस्तै महासचिवमा जानकी गुरुङ र कोषाध्यक्षमा सोम सापकोटा उम्मेद्वार”

त्यस्तै गरी नेकपा निकट भनेर चिनिएको पन्त समुहले पनि करिब-करिब आफ्नो समुह तयार पारिसकेको छ । पन्त समुहको उपाध्यक्षमा बद्रि केसी, महासचिवमा डा. हेमराज केसी, कोषाध्यक्षमा सुदन थापा र प्रवक्तामा डिबी क्षेत्रीलाई आफ्नो टिममा लिएर चुनाव लड्ने पक्का भएको छ।

“पन्त समुहको उपाध्यक्षमा बद्रि केसी, महासचिवमा डा. हेमराज केसी, कोषाध्यक्षमा सुदन थापा र प्रवक्तामा डिबी क्षेत्री चुनाव लड्ने पक्का”

यसअघि महासचिवमा उम्मेवदारी दिने तयारीमा रहेका डिबी क्षेत्रीलाई पन्तले प्रवक्ता पदका लागि सहमतिमा ल्याएको भए पनि पन्त समुहले उम्मेद्वारको अन्तिम टुँगो भने लगाईसकेको छैन।