मोहेन्जोदारोकी समरीन सोलंगी, जसले माटोलाई पनि सुन बनाइदिन्छिन्
इस्लामाबाद (बीबीसी)। जब समरिन सोलंगीको जन्म भयो उनकी हजुरआमाले भनेकी थिइन् ‘यो सुनको औंला भएकी केटी हो ।’ र, जब समरीनले माटोमा आफ्नो हात हालिन्, अनि सााच्चै त्यसलाई सुन बनाइदिइन् । समरीन सोलंगी मोहेन्जोदारो नजिकै भएको एक गाउँ हाजी लाल बख्श शेखमा बस्छिन् । उनी चिल्लो माटोबाट मोहेन्जोदारोको उत्खननमा भेटिएका मूर्तिहरु र मोहरहरुको शैलीमा चीजहरु बनाउँछिन् ।
२० वर्षीय समरीन सोलंगीका काका, पिता पनि मोहेन्जोदारोमा भेटिएका पुजारीहरु, नर्तकीहरु, मोहरहरु र हात्तीहरुको शैलीमा कलाकृति बनाउँथे । उनीहरुले यो काम आफ्ना पिताबाट सिकेका थिए जसले पुरातत्व विभागमा काम गर्थे । समरीनका अनुसार उनलाई बाल्यकालदेखि नै माटाका चीजहरु बनाउने सोख थियो त्यसैले उनी स्कुल गइनन् र यो काम सुरु गरिन् । अब उनी सबथोक बनाउँछिन् ।
हाजी लाल बख्श शेख गाउँ सिन्धु नदी नजिकै छ जहाँबाट उनी माटो ल्याउँछिन् । माटोलाई पहिले सुकाइन्छ त्यसपछि कुटेर मसिनो पारिन्छ । सबैभन्दा मसिनो माटोलाई मैदा भनिन्छ । समरीनका अनुसार मैदा निकालेपछि बाँकी माटोमा पानी हालेर त्यसलाई मुछिन्छ । उनीसँग पुजारी वा किंग प्रिस्टको साँचो छ । तर, बाँकी कुराहरु हातबाट बनाइन्छ । जसलाई बनाएर सुकाउन राखिन्छ । यी चीजहरु गर्मीमा एकदेखि डेढ दिनमा र जाडोमा २ देखि ३ दिनमा सुक्छन् ।
माटोबाट गहना बनाउने र लगाउने परम्परा त मोहेन्जोदारोदेखि लिएर शताब्दीऔं पुरानो थियो तर हालै यो एकपटक फेरि फेशनमा आएको छ । यी गहना अब भारत र पाकिस्तानसहित कैयौं देशमा बनाइन्छ । समरीन सोलंगीका अनुसार सिंध रोल सपोर्ट अर्गनाइजेसन नामको एक गैर सरकारी संगठनले उनलाई गहना बनाउने प्रशिक्षण दिएको छ । उनका अनुसार ३ दिनको प्रशिक्षणमा उनको साथमा १० जना केटीहरु थिए र उनीहरुले प्रशिक्षणको क्रममा सिमाइएका कुराहरु आफ्नो दिमागमा त्यसरी नै पकाएका छन् जसरी माटो पकाइन्छ ।
अब उनी माटोबाट कानका बाली, झुम्का र अन्य गहना बनाउँछिन् । यी गहना बनाउनको लागि उनीसँग कुनै विशेषउपकरण छैन । उनीसँग केवल एक भाँचिएको छुरी, बल प्वाइन्ट केस र एक बक्स छ जसबाट गोलाइ आदि काम गर्छिन् । र, यो पूरा कमाल कुनै स्टुडियो वा कारखानामा होइन उनको कच्ची घर र आँगनमा हुन्छ ।
उनी भन्छिन् ‘पहिले म झुम्काको घुँघरु र माथिको चक्की बनाउँछु । त्यसपछि तलको कप्पी बनाएर कलमले त्यसको डिजाइन बनाउँछु । यी दुई भागलाई जोडेर सुक्नको लागि छोडिदिन्छु । त्यसपछि गोबलका उपला बालेर यसलाई पकाउँछु र बिहानसम्म यी तयार हुन्छन् ।’ माटोका यी गहनामा हरेक किसिमका रंगको प्रयोग गरिन्छ । तर, झुम्काहरुमा खासगरी चाँदी र सुनको रंग धेरै मन पराइन्छ । समरीनका अनुसार यसमा सुनौलो रंग लगाएपछि रातो र हरियो रंग भरिन्छ जसबाट यिनीहरु आकर्षक देखिन्छन् ।
समरीनको घरको रोजगारी मोहेन्जोदारो आउने पर्यटकहरुमा निर्भर थियो जो कोरोनाका कारण प्रभावित भएको छ । उनका अनुसार पर्यटक गर्मीमा कम र जाडोमा धेरै आउँथे । तर, कोरोनाका कारण यहाँ पर्यटक आउन बन्द भएको छ । यसका कारण उनले बनाएका मूर्ति र मोहरहरु बिक्न छाडेका थिए । सक्खरकी एक छात्रा अक्सा शोरोले समरीनलाई सहयोग गरिन् र उनलाई सामाजिक संजालसँग परिचित गराइन् । जसबाट समरीनको यो सीप लोकप्रिय भयो र अब उनले माटोका गहनाको अर्डर पाइरहेकी छिन् ।
समरीन सोलंगीका पिताको कला उनका पूर्वजहरुको विरासत हो । उनका ६ दिदीबहिनी छन् तर दाजुभाइ छैनन् । ‘दाजुभाइको कमी त हुन्छ नै, दाजुभाइ त दाजुभाइ नै हुन्छन् तर हामी सोच्छौं कि हामी बाबाको लागि छोरा हौं र हामी छोराले गर्ने नै काम गर्छौं । बाबालाई कहिल्यै छोराको कमी हुन दिएनौं, छोरा त छोरा नै हुन्छ । यदि छोरीहरुलाई पनि यही नजरले हेर्ने हो भने छोरी पनि छोरा नै हुन्छन् ।’ समरीनका पिताको स्वास्थ्य ठिक रहँदैन । उनी काम गर्दैनन् तर यो काममा आफ्ना छोरीहरुलाई सघाउँछन् । समरीन र उनका दिदीबहिनी उनको हेरचाह गर्छन् ।
उनी बिहान छिटो उठ्छिन् र माटोबाट कहिले मूर्तिहरु, मोहर र कहिले आभूषण बनाउँछिन् । एउटा झुम्का बनाउन एक घण्टा लाग्छ । रंग लगाएर पूर्णता दिएपछि एउटा झुम्काको मूल्य ३ सय रुपैयाँ पर्छ । समरीन भन्छिन् ‘जो आम्दानी हुन्छ त्यसबाट केवल गुजारा हुन्छ किनकि राशनका अलावा रंग र अन्य सामानका साथै प्याकिङको पनि खर्च हुन्छ ।’
बीबीसीका पत्रकार रियाज सुहैलले समरीनसँग उनको सपना के हो भनेर सोध्दा उनले आफ्नो बानीअनुसार मुस्कुराउँदै भनिन् ‘मेरो त कुनै इच्छा छैन ।’ पत्रकारले उनीसँग फेरि सोधे कि केही त होला । त्यसपछि उनी एक पटक फेरि मुस्कुराइन् र भनिन् उनी आफ्नो परिवार र दिदीबहिनीलाई खुसी देख्न चाहन्छिन् ।
Facebook Comment