फ्रान्सले ‘अमेरिका र अस्ट्रेलियाले हाम्रो पिठ्युँमा छुरा रोपे’ किन भन्यो ? – Dcnepal

फ्रान्सले ‘अमेरिका र अस्ट्रेलियाले हाम्रो पिठ्युँमा छुरा रोपे’ किन भन्यो ?

काठमाडौं। अमेरिका र अस्ट्रेलियाले परमाणु पनडुब्बी खरिद गर्ने सम्बन्धमा गरेको सम्झौताप्रति फ्रान्सले उग्र प्रतिक्रिया दिएको छ । खासमा अस्ट्रेलियाले पहिले यी परमाणु पनडुब्बीहरु फ्रान्ससँग किन्ने तय थियो । फ्रान्सको आक्रोशको अनुमान यसबाट पनि गर्न सकिन्छ कि फ्रान्सका विदेशमन्त्री जीन इभ ले ड्रियांले यसलाई ‘पिठ्युँमा छुरा रोप्नु’ भनेका छन् ।

फ्रान्सले ५ वर्ष पहिले पारम्पिरिक रुपले सञ्चालित १२ पनडुब्बीहरु अस्ट्रेलियालाई बेच्नको लागि एक सम्झौतामा हस्ताक्षर गरेको थियो । यो सम्झौता ५६ बिलियन युरोको थियो । तर, त्यसपछि खबर आयो कि बेलायत, अमेरिका र अस्ट्रेलिया एक रणनीतिक साझेदारीको डील गरिरहेका छन् । यी तीन देशको यो रक्षा सम्झौताले फ्रान्ससँग भएको पनडुब्बी सम्झौतालाई रद्द गरिदिएको छ । फ्रान्सका विदेशमन्त्री जीन इभ ले ड्रियाँले यसलाई पिठ्युँमा छुरा रोप्नुजस्तै भएको बताएका छन् ।

उनले अस्ट्रेलियासँग फ्रान्सको विश्वासको सम्बन्ध भएको र यो सम्बन्ध अब टुटेको बताएका छन् । फ्रान्सका रक्षा मन्त्री फ्लोरान्स पार्लीले यो आफ्नो बचनबाट पछि हटेका कारण नराम्रो खबर भएको बताए । बीबीसी संवाददाताका अनुसार फ्रान्स अस्ट्रेलियासँग निकै रुष्ट छ तर यो आक्रोश अमेरिकाप्रति अझै बढी छ किनकि फ्रान्सलाई लागिरहेको छ कि अमेरिकाको दबाबकै कारण अस्ट्रेलियाले पुरानो सम्झौता तोड्नु परेको हो ।

ले ड्रियाँले राष्ट्रपति बाइडेनको व्यवहार एकतर्फी, क्रुर र पूर्व राष्ट्रपति डोनाल्ड ट्रम्पको स्मरण गराउने खालको भएको टिप्पणी गरेका छन् । उनले आफ्ना सहयोगीसँग कसैले पनि यस्तो व्यवहार नगर्ने बताए । अमेरिका, बेलायत र अस्ट्रेलिया हिजो परमाणु पनडुब्बीसम्बन्धी सम्झौताका लागि सहमत भएका थिए । चीनलाई रोक्नको लागि गरिएको भनिएको यो सम्झौतामा अर्को हप्ता हस्ताक्षर हुन सक्ने बेलायती अखबार द सनले जनाएको छ ।

Facebook Comment


सम्बन्धित खवर

ताजा भिडियो