विश्वकपमा छनोट हुन पोर्चुगलले युरोपियन च्याम्पियन इटलीको सामना गर्नुपर्ने
काठमाडौं। विश्वकप छनोटमा सर्बियासँग पराजित भएर सिधै विश्वकपमा जान नसकेको क्रिस्टियानो रोनाल्डोको टिम पोर्चुगलले अब विश्वकपमा छनोट हुन युरोपेली च्याम्पियन इटलीको सामना गर्नु पर्नसक्ने देखिएको छ । युरोपेली च्याम्पियनसिपका पछिल्ला दुई संस्करणका विजेताहरु पोर्चुगल र इटली विश्वकपमा सिधै छनोट हुन सकेन । निर्णायक खेलमा पोर्चुगल सर्बियासँग र इटली स्विट्जरल्याण्डसँग पराजित भए ।
अब यी दुवै प्लेअफ खेल्नुपर्नेछ जहाँ विश्वकपमा पुग्ने तीन स्थानको लागि १२ टिमको प्रतिस्पर्धा हुनेछ । दुवै टिम सेमिफाइनल ड्रमा सीडेड समूहमा छन् जसको अर्थ उनीहरु एउटै बाटोमा पर्ने र एक अर्कासँग प्रतिस्पर्धा गर्नुपर्ने अवस्था रहेको इएसपिएनले जनाएको छ । प्लेअफ ड्र नोभेम्बर २६ शुक्रबार स्विट्जरल्याण्डको ज्युरिखमा सार्वजनिक हुनेछ ।
सेमिफाइनल ड्रमा पोर्चुगल, स्कटल्याण्ड, इटली, रुस, स्वेडेन र वेल्स सीडेड समूहमा छन् भने टर्की, पोल्याण्ड, नर्थ म्यासेडोनिया, युक्रेन, अष्ट्रिया र चेक रिपब्लिक अनसीडेड समूहमा छन् । यी ६ सीडेड टिमहरु सेमिफाइनलमा आफ्नो होमग्राउण्डमा खेल्नेछन् । ड्रमा पोर्चुगल र इटली एउटै पाथमा परे भने उनीहरुले एक अर्काविरुद्ध खेल्नुपर्ने अवस्था आउनेछ । यस्तोमा यी दुईमध्ये एउटाले कतारमा विश्वकप खेल्न पाउने छैन् ।
Facebook Comment