काठमाडौं । अस्ट्रेलियामा माछा मार्न गएका २ नेपाली युवाको दुर्घटनामा मृत्यु भएको छ । न्यू साउथ वेल्सको सिड्नी सहरबाट दक्षिणतर्फ रहेको माछा मार्ने स्पटमा माछा मार्न गएका उनीहरु ढुङगाबाट लडेपछि मृत्यु भएको हो ।

अस्ट्रेलियाको मिडिया सेभेन न्यूजका अनुसार दक्षिणी सिड्नीको कर्नेलमा रहेको केप सोलान्डर ड्राइभमा माछा मार्न गएका उनीहरु लडेको खबर पाएपछि आकस्मिक सेवा तत्काल पुगेको थियो ।

मरिन रेस्क्यु, लाइफगार्ड, प्रहरी र पारामेडिक्ससहितको टोलीले तत्काल उनीहरुलाई माथि ल्याएर सीपीआर दिएको भए पनि उनीहरुलाई बचाउन नसकिएको समाचारमा जनाइएको छ ।

मृतकहरु दुवै नेपाली नागरिक भएको र उनीहरुको उमेर २२ र २५ वर्ष रहेको बताइएको छ । तर, उनीहरुको थप परिचय खुलाइएको छैन ।