काठमाडौं । युक्रेनसँग जारी युद्धका बीच, रुसी राष्ट्रपति भ्लादिमिर पुटिनले इस्टरमा युद्धविरामको घोषणा गरेका छन्।

उनले युद्धविराम अवधिमा युक्रेनमा सबै सैन्य कारबाही रोक्न आदेश दिएका छन् र युक्रेनले पनि त्यस्तै गर्ने अपेक्षा गरेको बताएका छन्।

अनलाइन सेयर गरिएको एउटा भिडियोमा पुटिनले भनेका छन् ‘यदि कुनै उत्तेजना उत्पन्न भएमा वा युद्धविराम उल्लङ्घन भएमा रुसी सेनाहरू प्रतिकार गर्न तयार हुनेछन्।’

रुसी रक्षा मन्त्रालयले एक विज्ञप्ति जारी गर्दै रुसले शनिबार साँझ ६ बजे (नेपाली समय अनुसार ८:४५ बजे) देखि आइतबार मध्यरात (नेपाली समय सोमबार बिहान पौले ३ बजे) सम्म सबै सैन्य कारबाही बन्द गर्ने जनाएको छ।

मन्त्रालयले सबै सैन्य कारबाही रोक्न आदेश दिइएको बताएको छ।