काठमाडाैं। आईपीएल २०२६ को ३४ औँ खेलमा रोयल च्यालेन्जर्स बेङ्गलोर (आरसीबी) ले गुजरात टाइटन्समाथि ५ विकेटको शानदार जित दर्ता गरेको छ। एम. चिन्नास्वामी स्टेडियममा भएको रोमाञ्चक खेलमा गुजरात टाइटन्सले दिएको २०६ रनको विशाल लक्ष्यलाई आरसीबीले १८.५ ओभरमा ५ विकेट गुमाएर सफलतापूर्वक पछ्यायो।

खेलमा टस जितेर पहिले बलिङ रोजेको आरसीबीका लागि गुजरात टाइटन्सका साई सुदर्शनले उत्कृष्ट शतक प्रहार गर्दै टोलीलाई २०५ रनको चुनौतीपूर्ण योगफलसम्म पुर्‍याएका थिए। गुजरातका लागि ओपनिङमा आएका शुभमन गिलले ३२ रन जोड्दै सुदर्शनलाई साथ दिएका थिए। सुदर्शनले ५८ बलमा शतक पुरा गरेपछि टोलीको स्कोर २०० रन पार गर्न सफल भएको थियो। आरसीबीका बलरहरूले अन्तिम ओभरहरूमा कसिलो बलिङ गर्दै गुजरातलाई थप ठूलो स्कोर बनाउनबाट रोकेका थिए।

२०६ रनको लक्ष्य पछ्याउने क्रममा आरसीबीको सुरुवात त्यति राम्रो हुन सकेन। पहिलो ओभरमै ज्याकोब बेथल सस्तैमा आउट भएपछि टोली दबाबमा देखिएको थियो। यद्यपि, त्यसपछि आएका विराट कोहली र देवदत्त पडिक्कलले उत्कृष्ट साझेदारी गर्दै खेललाई नियन्त्रणमा लिए। कोहलीलाई खाता खोल्नुअघि नै जीवनदान मिलेको थियो, जसको उनले भरपूर फाइदा उठाउँदै ४४ बलमा ८१ रनको आक्रामक इनिङ खेले। उनलाई साथ दिँदै पडिक्कलले २७ बलमा ५५ रन बनाए। यी दुईबीचको ११५ रनको साझेदारीले आरसीबीको जितको आधार तय गरेको थियो।

कोहली र पडिक्कल आउट भएपछि आरसीबीले केही समय दबाब महसुस गरे पनि अन्त्यमा क्रुनाल पान्ड्या र टिम डेभिडले संयमित ब्याटिङ गर्दै टोलीलाई जितसम्म पुर्‍याए। क्रुनालले १२ बलमा अविजित २३ रन बनाए भने टिम डेभिडले १० रनको योगदान दिए।

गुजरातका बलरहरूले केही विकेट लिएर खेलमा फर्किने प्रयास गरे पनि आरसीबीको ब्याटिङ लाइनअपले ७ बल बाँकी छँदै विजय हासिल गर्‍यो। आरसीबीका लागि विराट कोहली ‘प्लेयर अफ द म्याच’ घोषित भए। यस जितसँगै आरसीबी अंक तालिकामा आफ्नो स्थिति अझ सुदृढ पार्दै दोस्रो स्थानमा उक्लिएको छ।