काठमाडौं । स्पेनिस ला लिगा २०२५–२६ को नयाँ च्याम्पियन एफसी बार्सिलोनाले लिग इतिहासमै अभूतपूर्व कीर्तिमान कायम गरेको छ। मुख्य प्रशिक्षक हान्सी फ्लिकको नेतृत्वमा रहेको बार्सिलोनाले यस सिजन आफ्नो घरेलु मैदानमा खेलिएका सबै खेल जित्दै ला लिगाको आधुनिक इतिहासमा एउटा स्वर्णिम पाना थपेको हो।

स्पोटिफाइ क्याम्प नोउमा सम्पन्न सिजनको आफ्नो अन्तिम घरेलु खेलमा रियल बेटिसलाई ३–१ गोल अन्तरले पराजित गर्दै बार्सिलोनाले यो ऐतिहासिक सफलता प्राप्त गरेको छ। यस जितसँगै बार्सिलोना २० टोली सम्मिलित ३८ खेलको आधुनिक ला लिगा इतिहासमा एकै सिजनका सबै १९ घरेलु खेल जित्ने पहिलो क्लब बनेको छ।

लिग उपाधि दुई हप्ता अगाडि नै निश्चित गरिसकेको बार्सिलोनाका लागि यो खेल घरेलु मैदानमा ‘परफेक्ट रेकर्ड’ कायम गर्ने प्रतिष्ठाको विषय बनेको थियो। खेलमा बार्सिलोनालाई जिताउन ब्राजिलियन विङ्गर राफिन्हाले उत्कृष्ट प्रदर्शन गरे।

उनले खेलको २७ औं मिनेटमा गोल गर्दै बार्सिलोनालाई सुरुवाती अग्रता दिलाएका थिए भने दोस्रो हाफको ६१ औं मिनेटमा व्यक्तिगत दोस्रो गोल गर्दै टोलीको अग्रता दोब्बर बनाए।

खेलको ६८ औं मिनेटमा रियल बेटिसका अनुभवी मिडफिल्डर इस्कोले पेनाल्टीमार्फत गोल गर्दै खेललाई २–१ को स्थितिमा ल्याएर बार्सिलोनालाई केही दबाबमा राखेका थिए। तर त्यसको पाँच मिनेटपछि नै जोआओ कान्सेलोले आकर्षक गोल गर्दै बार्सिलोनाको ३–१ को जित र ऐतिहासिक कीर्तिमान पक्का गरे।

बार्सिलोनाले यसअघि सन् १९५९–६० को सिजनमा हेलनियो हरेराको प्रशिक्षणमा घरेलु मैदानका सबै खेल जितेको इतिहास थियो। तर, त्यतिबेला ला लिगामा टोलीहरूको संख्या कम हुन्थ्यो र घरेलु मैदानमा केवल १५ खेल मात्र खेल्नुपर्थ्यो।

सन् १९९७ देखि ला लिगामा २० टोलीको ढाँचा अर्थात् ३८ खेलको सिजन र १९ घरेलु खेल खेल्ने नियम स्थायी रूपमा लागू भएयता रियल म्याड्रिड वा बार्सिलोना कसैले पनि घरेलु मैदानमा शतप्रतिशत नतिजा निकाल्न सकेका थिएनन्। फ्लिकको यो टोलीले घरेलु मैदानबाट सम्भावित ५७ अंकमा ५७ अंक नै जोडेर यो कीर्तिमानलाई आफ्नो नाममा गराउन सफल भएको छ।

यस सिजन बार्सिलोनाले ला लिगामा पूर्ण रूपमा एकछत्र राज गरेको छ। दोस्रो स्थानमा रहेको चिरप्रतिद्वन्द्वी रियल म्याड्रिडलाई भारी अंकको दूरीमा पछि पार्दै बार्सिलोनाले आफ्नो २९ औं ला लिगा उपाधि उचालेको हो।

सिजनको अन्तिम खेल अर्को साता भ्यालेन्सियाको मैदानमा अवे खेलका रूपमा हुन बाँकी रहे पनि बार्सिलोनाले घरेलु मैदानको यात्रा भने ऐतिहासिक र सुखद अन्त्य गरेको छ।

ला लिगामा यसअघि कुनै पनि टोलीले गर्न नसकेको यो ‘होम क्लिन स्वीप’ले हान्सी फ्लिकको पहिलो सिजनलाई फुटबल इतिहासकै सबैभन्दा प्रभावशाली डेब्यू सिजनमध्ये एक बनाएको छ।