काठमाडौं । फिफा विश्वकप २०२६ को समूह चरणका खेलहरू समाप्त भएसँगै विश्व फुटबलका दुई महाशक्तिहरू फ्रान्स र जर्मनीको नकआउट यात्रालाई लिएर एउटा रोचक र स्तब्ध पार्ने समीकरण बाहिर आएको छ।

फिफाद्वारा सार्वजनिक गरिएको नयाँ विस्तारित ४८ टोलीको खेल तालिका अनुसार यतिबेला फ्रान्स र जर्मनी दुवै टोली एकै साथ क्वाटरफाइनल चरणमा पुग्न प्राविधिक र गणितीय रूपमा असम्भव देखिएको छ।

समूह ‘आई’ को विजेता बन्दै फ्रान्स र समूह ‘ई’ को विजेता बन्दै जर्मनीले ‘राउन्ड अफ ३२’ (नकआउट चरण) मा आफ्नो स्थान सुरक्षित गरे पनि उनीहरू एउटै विङ्गतर्फ परेका कारण यी दुवे पूर्व विश्वविजेता धेरै चाँडो एकअर्कासँग भिड्ने निश्चित जस्तै भएको छ।

यस नयाँ नकआउट प्रणालीअनुसार आगामी सोमबार, जुन २९ मा जर्मनीले आफ्नो ‘राउन्ड अफ ३२’ को खेलमा पराग्वेको सामना गर्दैछ भने त्यसको भोलिपल्ट अर्थात् जुन ३० मा फ्रान्सले स्वीडेन विरुद्ध प्रतिस्पर्धा गर्नेछ।

यदि यी दुवै टोलीले आ-आफ्नो खेल जितेर अघिल्लो चरण प्रवेश गरेमा, उनीहरू सिधै ‘राउन्ड अफ १६’ मा आमुन्नेसामुन्ने हुनेछन्। आगामी जुलाई ४ का लागि तय भएको उक्त सम्भावित राउन्ड अफ १६ को महाभिडन्त एउटा ‘इलिमिनेसन म्याच’ हुनेछ, जसको अर्थ विजेता टोली क्वाटरफाइनलमा पुग्नेछ भने पराजित हुने टोली त्यहीँबाटै घर फर्कन बाध्य हुनेछ।

विश्वकपको इतिहासमै पहिलो पटक यति ठूला दुई दावेदार टोलीहरू क्वाटरफाइनल भन्दा निकै अगाडि नै एकअर्कालाई पाखा लगाउन बाध्य हुनुपर्ने यो समीकरणले फुटबल प्रेमीहरूलाई निकै रोमाञ्चित र अचम्मित बनाएको छ।

फुटबल विश्लेषकहरूका अनुसार फ्रान्स र जर्मनी दुवैले समूह चरणमा शीर्ष स्थान हासिल गरे पनि फिफाको ड्रको संरचना नै यसरी तयार गरिएको छ कि यी दुई टोलीको भेट निकै अगाडि नै निश्चित भयो।

परिणामस्वरूप, यस पटकको विश्वकपको अन्तिम आठ अर्थात् क्वाटरफाइनलको रोस्टरमा कि त किलियन एम्बाप्पेको फ्रान्स हुनेछैन या त युवा स्टारहरूले भरिएको जर्मनी देखिने छैन। दुवै टोली सँगै अगाडि बढ्न नसक्ने यो कडा समीकरणले यस पटकको नकआउट चरणलाई अझ बढी प्रतिष्ठाको लडाइँ र रोमाञ्चक बनाएको छ।