काठमाडौं । न्यूजिल्याण्डको आम चुनावमा सेन्टर राइट नेसनल पार्टीले जित हासिल गरेको छ । विगत ६ वर्षदेखि सत्तामा रहेको लेबर सरकारलाई पराजित गर्दै पार्टीले यो जित सुनिश्चित गरेको हो ।

अब देशको अर्को प्रधानमन्त्री क्रिस्टोफर लक्सन हुनेछन् । लक्सनले आफ्नो पार्टीले सरकार गठनका लागि दक्षिणपन्थी एसीटी पार्टीसँग गठबन्धन गर्ने बताएका छन् ।

लक्सनले जितपछि न्यूजिल्याण्डका नागरिकलाई भने, ‘हाम्रो सरकारले न्युजिल्यान्डका हरेक नागरिकका लागि काम गर्नेछ । किनभने हामी अर्थतन्त्रलाई पुनर्जीवित गर्नेछौं र कर छुट दिनेछौं।”

“हामी जीवनयापनको लागत घटाउनेछौं र कानूनको शासन स्थापना गर्नेछौं। हामी राम्रो स्वास्थ्य सेवा प्रदान गर्नेछौं, बच्चाहरूलाई शिक्षित गर्नेछौं ताकि तिनीहरूले सपना देखेको जीवन बिताउनको लागि हुर्कन सकून्।”

यसै वर्षको सुरुमा न्यूजिल्याण्डकी प्रधानमन्त्री जसिन्डा आर्डर्नले आफ्नो पदबाट राजीनामा दिएकी थिइन् । यसपछि लेबर पार्टीका क्रिस हिपकिन्सलाई देशको कार्यवाहक प्रधानमन्त्री बनाइएको थियो । क्रिस्टोफर त्यतिबेला देशको विपक्षी नेता थिए ।