काठमाडौं । इजरायली सेनाले दक्षिणी गाजामा युद्धविरामको कुनै जानकारी नभएको र त्यसमा कुनै सम्झौता नभएको बताएको छ ।

इजरायली सेनाका प्रवक्ता लेफ्टिनेन्ट कर्नल रिचर्ड हेचले बीबीसीलाई भने, “युद्धविराममा कुनै सहमति भएको छैन, हामीलाई यसबारे कुनै जानकारी छैन। म पनि रिपोर्टहरूमा यो सबै देखिरहेको छु। म यसको पुष्टि गर्दिन।”

समाचार एजेन्सी रोयटर्सले केही समयअघि आफ्नो रिपोर्टमा इजिप्टका सुरक्षा अधिकारीहरूलाई उद्धृत गर्दै इजिप्ट-गाजा सीमा खोल्ने क्रममा दक्षिणी गाजामा युद्धविराममा सहमति भएको बताएको थियो।

सोमबार इजिप्टसँगको गाजाको सीमा नाका (राफा क्रसिङ) खोलिएको समाचार छ। इजिप्ट यो क्रसिङ खोल्न अन्तर्राष्ट्रिय सहायता एजेन्सीहरूको दबाबमा छ।

शनिबार अमेरिकाले आफ्ना नागरिकहरूलाई क्रसिङ खोल्ने समयमा तयार रहन र दक्षिणतर्फ जान सल्लाह दिएको थियो । धेरै प्यालेस्टिनी-अमेरिकीहरू पहिले नै क्रसिङ नजिक भेला भएका छन् ।