राजविराज। सप्तरीको तिलाठी कोइलाडी गाउँपालिका-६ स्थित वभनगामा टोलमा गएराति भीषण आगलागी भएको छ।

स्थानीय रामअवतार यादवको गाईगोठमा लामखुट्टे भगाउन बालिएको घुरबाट आगो सल्किएर भएको यस दुर्घटनामा परी छ परिवारको १२ वटा घर र गोठ जलेर पूर्ण रूपमा नष्ट भएको छ।

आगलागीका कारण रामअवतार यादवका दुई घर र एक गोठ, छिमेकी जुगाइ यादवका दुई घर र एक गोठ तथा अनिल यादवका दुई घर र एक गोठ खरानी भएका छन्। यस्तै, योगिन्द्र यादव, राजकुमार यादव र धीरेन्द्र यादवको पनि एक-एक वटा घर जलेर नष्ट भएको स्थानीय रामनाथ यादवले जानकारी दिए।

जिल्ला प्रहरी कार्यालयका अनुसार आगलागीबाट घरमा रहेका खाद्यान्न, लत्ताकपडा, गरगहना, फर्निचर र नगदसहित करिब ४५ लाख रुपैयाँभन्दा बढीको धनमाल क्षति भएको प्रारम्भिक अनुमान गरिएको छ।

हनुमाननगर कङ्कालिनी नगरपालिका र मधेस-प्रदेश प्रहरी तालिम केन्द्र राजविराजबाट पुगेका वारुण यन्त्रका साथै स्थानीय बासिन्दाको सक्रियतामा आगो नियन्त्रणमा लिइएको थियो। रातिको समयमा भएको आगलागीका कारण पीडित परिवारहरूको बिचल्ली भएको छ।