काठमाडौं । द्वन्द्वग्रस्त मुलुक म्यानमारका शरणार्थीहरू सुरक्षा र राम्रो अवसरको खोजीमा जोखिमपूर्ण समुद्री यात्रामा निस्कने क्रम जारी रहँदा, हालैका दिनहरूमा म्यानमारको तटीय क्षेत्रमा ५०० भन्दा बढी मानिस सवार दुईवटा डुङ्गाहरू पल्टिएको हुन सक्ने संयुक्त राष्ट्रसङ्घीय निकायहरूले बिहीबार जनाएका छन्।

अन्तर्राष्ट्रिय आप्रवासन सङ्गठन र संयुक्त राष्ट्रसङ्घीय शरणार्थी उच्चायुक्त (युएनएचसीआर) द्वारा जारी एक संयुक्त विज्ञप्तिमा भनिएको छ, “प्रारम्भिक सूचना अनुसार, ती दुईवटा जलयानहरू जुन महिनाको अन्त्यतिर म्यानमारको राखाइन राज्यबाट प्रस्थान गरेका थिए। जसमा अधिकांश रोहिङ्ग्या यात्रुहरू सवार थिए र तीमध्ये केही बङ्गलादेशको कक्स बजारस्थित शरणार्थी शिविरबाट आएका थिए।”

उक्त दुर्घटनामा ५०० भन्दा बढी मानिसको मृत्यु भएको हुन सक्ने आशंका गरिएको छ। घटना र हताहत हुनेहरूको आधिकारिक संख्या अझै पुष्टि हुन बाँकी रहे तापनि यस सम्भावित विनाशकारी मानवीय क्षतिप्रति यूएनएचसीआर र आईओएमले गम्भीर चिन्ता व्यक्त गरेका छन्।

म्यानमारको अल्पसङ्ख्यक रोहिङ्ग्या मुस्लिम समुदायका सदस्यहरूले स्वदेशमा हुने हिंसा र बङ्गलादेशका खचाखच भरिएका शरणार्थी शिविरहरूको दयनीय अवस्थाका कारण वर्षौंदेखि मलेसिया, इन्डोनेसिया वा थाइल्याण्ड जस्ता देशहरूमा सुरक्षा र अवसरको खोजीमा कमजोर काठका डुङ्गाहरूमा आफ्नो ज्यान जोखिममा पार्दै आएका छन्।

राष्ट्रसङ्घीय निकायहरूका अनुसार करिब २५० जना सवार पहिलो डुङ्गा प्रस्थान गरेको केही समयमै सम्पर्कविहीन भएको थियो भने करिब २८० जना बोकेको दोस्रो डुङ्गा गत जुलाई ८ मा म्यानमारको आययारवाडी तटीय क्षेत्रमा डुबेको विश्वास गरिएको छ।

यो यात्रा नियमित रूपमा डुङ्गा चल्ने अनुकूल मौसमभन्दा बाहिरको समयमा गरिएको थियो, जुन बेला समुद्री परिस्थिति सामान्यतया बढी जोखिमपूर्ण हुने गर्दछ। ती एजेन्सीहरूका अनुसार यस वर्ष रोहिङ्ग्या शरणार्थी र बङ्गलादेशी नागरिकसहित झण्डै ३०० जना मानिस अन्डमान सागर र बङ्गालको खाडीमा बेपत्ता वा मृत घोषित भइसकेका छन्।