काठमाडौं । यमनको तटीय क्षेत्र नजिकै तान्जानियाको झण्डा बोकेको एउटा तेल ट्याङ्करलाई सोमाली समुद्री डाँकुहरूले अपहरण गरेका छन्। सुरक्षा स्रोत तथा स्थानीय अधिकारीहरूले आइतबार यस घटनाको आधिकारिक पुष्टि गरेका हुन्। अपहरणपछि सो ट्याङ्करलाई सोमालियाको अर्ध-स्वायत्त क्षेत्र पुन्टल्याण्ड अन्तर्गत पर्ने बारी इलाकाको समुद्री क्षेत्रतर्फ लगिएको बताइएको छ।

प्राप्त विवरण अनुसार ‘एमटी असाना’ नाम गरेको उक्त जनरल ट्याङ्कर गत शुक्रबार यमनको मुकल्ला बन्दरगाहबाट प्रस्थान गरेको थियो। प्रस्थान गरेको केही समयमै सात जना हतियारधारी सोमाली डाँकुहरूले जहाजलाई आफ्नो नियन्त्रणमा लिएका थिए। हाल सो ट्याङ्करलाई पुन्टल्याण्डको कालूला तट नजिकै रोकेर राखिएको छ।

जहाजहरूको आवतजावतमाथि निगरानी राख्ने सार्वजनिक ट्र्याकिङ डेटा अनुसार, घटनाका बखत ‘एमटी असाना’ अदनको खाडीमा अत्यन्तै ढिलो गतिमा अगाडि बढिरहेको थियो। सो जहाजको अन्तिम गन्तव्य सोमालियाको बोसासो बन्दरगाह रहेको जनाइएको थियो।

रिपोर्ट अनुसार अपहरणका क्रममा जहाजबाट संकटकल वा ‘डिस्ट्रेस अलर्ट’ समेत जारी गरिएको थियो। यद्यपि, ट्याङ्करमा जम्मा कति जना चालक दलका सदस्यहरू सवार थिए र उनीहरूमध्ये कोही घाइते भएका छन् या छैनन् भन्ने कुरा अझै स्पष्ट हुन सकेको छैन। चालक दलका सदस्यहरूको नागरिकताका बारेमा पनि कुनै आधिकारिक जानकारी बाहिर आएको छैन।

यस कथित अपहरणको घटनाबारे पुन्टल्याण्ड प्रशासनले हालसम्म कुनै आधिकारिक वक्तव्य जारी गरेको छैन। त्यसैगरी, सो ट्याङ्करका धनी वा व्यवस्थापक कम्पनीका तरफबाट पनि कुनै प्रतिक्रिया आएको छैन। सो क्षेत्रमा गस्ती गर्ने अन्तर्राष्ट्रिय नौसैनिक बलहरूले पनि यस विषयमा हालसम्म कुनै सार्वजनिक अपडेट दिएका छैनन्।

पछिल्ला केही महिनाहरूमा अदनको खाडी र पश्चिमी हिन्द महासागरमा सोमाली समुद्री डाँकुहरूको गतिविधि पुनः तीव्र बन्दै गएको छ। समुद्री सुरक्षा विज्ञहरूका अनुसार अन्तर्राष्ट्रिय नौसैनिक गस्तीमा आएको कमी र क्षेत्रमा बढेका अन्य समुद्री सुरक्षा चुनौतीहरूका कारण यो भेगमा समुद्री डकैतीको जोखिम फेरि एकाएक बढेको हो।