काठमाडौं । ब्राजिल सरकारले अमेरिकी ट्रम्प प्रशासनका दुई वरिष्ठ अधिकारीहरूलाई प्रवेश भिसा दिन अस्वीकार गरेको छ। आगामी अक्टोबरमा हुन गइरहेको राष्ट्रपति निर्वाचनअघि ब्राजिलको विद्युतीय मतदान प्रणाली र चुनावी व्यवस्थाको विश्वसनीयतामाथि प्रश्न उठाउने उद्देश्यले भ्रमणको योजना बनाएको भन्दै ब्राजिलले उनीहरूलाई भिसा नदिएको हो।

अन्तर्राष्ट्रिय समाचार एजेन्सी ‘रोयटर्स’ का अनुसार ब्राजिलका दुई जना वरिष्ठ अधिकारीहरूले नाम नछाप्ने शर्तमा उक्त भिसा अस्वीकृतिको पुष्टि गरेका हुन्। अमेरिकी अधिकारीहरूको यो भ्रमणलाई अक्टोबरमा हुने राष्ट्रपतीय निर्वाचनलाई प्रभावित पार्ने नियतका रूपमा हेरिएको ब्राजिलियन पक्षको दाबी छ। उक्त निर्वाचनमा वर्तमान वामपन्थी राष्ट्रपति लुइज इनासियो लुला डा सिल्भा र ट्रम्प समर्थक सीनेटर फ्लावियो बोल्सोनारो बीच मुख्य प्रतिस्पर्धा हुँदैछ।

ब्राजिलियन अधिकारीहरूका अनुसार गत शुक्रबार अमेरिकी प्रतिनिधिमण्डलको भिसा आवेदन खारेज गरिएको थियो। उक्त प्रतिनिधिमण्डलमा अमेरिकी विदेश मन्त्रालयको ‘ब्युरो अफ डेमोक्रेसी, ह्युमन राइट्स एन्ड लेबर’ का सहायक सचिव रिले एम. बार्न्स र उप-सहायक सचिव स्यामुअल स्याम्सन सहभागी हुने तय भएको थियो।

ब्राजिलका एक अधिकारीले राजनीतिक रूपमा स्थितिबाट फाइदा उठाउने र चुनावी व्यवस्थालाई कमजोर तुल्याउने प्रयास भइरहेको प्रमाणका आधारमा भिसा अस्वीकार गर्ने निर्णय लिइएको बताएका छन्। अमेरिकी विदेश मन्त्रालय र सीनेटर फ्लावियो बोल्सोनारोले भने यस विषयमा तत्काल कुनै आधिकारिक प्रतिक्रिया दिएका छैनन्।

अमेरिकी अधिकारीहरूको यो भ्रमण प्रयासलाई राष्ट्रपति डोनाल्ड ट्रम्पको प्रशासनले ल्याटिन अमेरिकी राजनीतिमा आफ्नो प्रभाव बढाउन गरिरहेको प्रयासका रूपमा हेरिएको छ। ट्रम्पले हालै कोलम्बियाका निर्वाचित राष्ट्रपति अबेलार्डो डे ला एस्प्रेलाका साथै अर्जेन्टिनाका जाभियर मिलेई र चिलीका जोसे एन्टोनियो कास्त जस्ता दक्षिणपन्थी नेताहरूलाई खुला समर्थन गर्दै आएका छन्।

ब्राजिलका पूर्वराष्ट्रपति जायर बोल्सोनारोले सन् २०२२ को निर्वाचनअघि देशको विद्युतीय मतदान प्रणालीमा धाँधली हुनसक्ने विनाप्रमाण दाबी गरेका थिए। सन् २०२२ को निर्वाचनमा लूला डा सिल्भासँग पराजित भएपछि सुपेरियर इलेक्टोरल कोर्टले पदको दुरुपयोग गरेको ठहर गर्दै बोल्सोनारोलाई सन् २०३० सम्म चुनाव लड्न प्रतिबन्ध लगाएको थियो।

पछि निर्वाचन परिणाम उल्टाउने र सत्तामा टिकिरहने षड्यन्त्रमा दोषी ठहर गर्दै उनलाई २७ वर्षको जेल सजाय सुनाइएको थियो। हाल उनी नजरबन्द मा छन्।अहिले उनका छोरा फ्लावियो बोल्सोनारोले बुबाको राजनीतिक विरासत थाम्दै पुनः चुनावी प्रणालीमाथि शङ्का उब्जाउने अभिव्यक्ति दिइरहेका छन्। यद्यपि, ब्राजिलको निर्वाचन अदालत र सम्बन्धित प्रविधि कम्पनी दुवैले निर्वाचन पारदर्शी र सुरक्षित रहेको स्पष्ट पारिसकेका छन्।