काठमाडौं । साउदी अरेबिया र संयुक्त राज्य अमेरिकाले बुधबार इराकमा इरान समर्थित मिलिसिया अड्डाहरूमा संयुक्त हवाई आक्रमण गरेका छन् ।

अमेरिकाले यो कारबाहीलाई आफ्ना सेना र साउदी ऊर्जा प्रतिष्ठानहरूमा गरिएको ड्रोन आक्रमणको प्रतिक्रियाको रूपमा वर्णन गरेको छ।

यसैबीच, इरान समर्थित पपुलर मोबिलाइजेसन फोर्सेस (पीएमएफ) ले आक्रमणमा आफ्ना कम्तीमा २० लडाकु मारिएको र ३२ जना घाइते भएको दाबी गरेको छ।

अमेरिकी केन्द्रीय कमाण्ड (सेन्टकम) ले भन्यो, “पूर्वी इराकमा इरान समर्थित आतंकवादी लक्ष्यहरूलाई लक्षित गरी आक्रमणहरू गरिएको थियो। विगत ७२ घण्टामा, इरानी रिभोलुसनरी गार्ड कोर्प्स (आईआरजीसी) द्वारा निर्देशित अमेरिकी सेना र साउदी अरेबियाको ऊर्जा सुविधाहरूलाई लक्षित गरी गरिएका ३० भन्दा बढी ड्रोन आक्रमणहरू विफल पारिएको छ।”

सेन्टकमले दाबी गरेको छ कि मंगलबार इरानले अमेरिकी अड्डाहरूमा पनि क्षेप्यास्त्र आक्रमण गर्ने प्रयास गरेको थियो तर त्यसलाई रोकिएको थियो।

यसैबीच, इरानी रिभोलुसनरी गार्ड कोर्प्स ले अमेरिकाको ‘आक्रामक कारबाही’को प्रतिक्रियामा जोर्डनमा रहेको अमेरिकी एयरबेस र कमाण्ड सेन्टरलाई निशाना बनाएको दाबी गरेको छ।

आईआरजीसीले चेतावनीको बाबजुद पनि होर्मुजको जलडमरूमबाट गुज्रिएका तीन तेल ट्याङ्करहरूमाथि आफ्नो नौसेनाले कारबाही गरेको पनि बताएको छ।

अर्कोतर्फ, पपुलर मोबिलाइजेसन फोर्सेस (पीएमएफ) ले अमेरिका र साउदी अरेबियाको आक्रमणलाई इराकको सार्वभौमसत्ताको उल्लङ्घन र क्षेत्रीय तनाव बढाउने कदमको रूपमा वर्णन गरेको छ।