काठमाडौं । सन् २०२३ मा गजा युद्धको सुरुआती चरणमा गजा सिटीस्थित एक आवासीय भवनमा भएको इजरायली आक्रमणमा परी ज्यान गुमाएका ११२ जनाको सामूहिक शवयात्रा निकालिएको छ।

मृतकहरूको शव हालै दुई हप्तासम्म सञ्चालित एक अभियानका क्रममा भग्नावशेषबाट निकालिएको थियो। ती मृतकहरू दुई परिवारका सदस्य थिए।

सार्वजनिक तस्बिर तथा भिडियोहरूमा शवहरूलाई लहरै राखिएको देखिन्छ। प्रत्येक शवमा प्यालेस्टिनी झण्डा ओढाइएको थियो भने केही शवमा मृतकको तस्बिरसमेत राखिएको थियो। त्यसपछि आफन्तहरूले उनीहरूलाई अन्तिम संस्कारका लागि लगेका थिए।

गजामा अहिलेसम्म निकालिएको यो नै सबैभन्दा ठूलो सामूहिक शवयात्रा भएको बताइएको छ।

शोकसभामा सहभागी अली अबु शारियाले भने, “यो यस्तो अनुभूति हो, जुन हामीले धेरै अघि नै महसुस गर्नुपर्थ्यो। पीडा, शोक र आफ्ना प्रियजनहरूलाई गुमाउनुको दुःख। अब जब हामी उनीहरूको शव निकालेर सम्मानजनक रूपमा पुर्न सफल भएका छौँ, सायद यो गहिरो दुःखका बिच हामीलाई केही हदसम्म राहत मिलेको छ।”

आक्रमणमा ज्यान गुमाउनेहरूमा अबु शारिया र हस्सायना परिवारका ४० बालबालिका, ३८ महिला र सात जना अपाङ्गता भएका व्यक्तिहरू रहेका थिए।

यी दुवै परिवार एउटै ठूलो वंश (कबिला) सँग सम्बन्धित थिए। २२ नोभेम्बर २०२३ मा गजा सहरको साब्रा क्षेत्रस्थित एक आवासीय भवनमा भएको इजरायली हवाई आक्रमणमा परी उनीहरूको मृत्यु भएको थियो।

यो आक्रमण ७ अक्टोबर २०२३ मा दक्षिणी इजरायलमा हमासको नेतृत्वमा भएको आक्रमणको करिब छ हप्तापछि भएको थियो। हमासको उक्त आक्रमणमा करिब १,२०० जनाको मृत्यु भएको थियो भने २५१ जनालाई बन्धक बनाइएको थियो।