काठमाडौं । हमासका एक वरिष्ठ अधिकारीले गाजा शान्ति योजनाको पछिल्लो चरण लागू गराउनका लागि इजरायली प्रधानमन्त्री बेन्जामिन नेतान्याहुमाथि दबाब बढाउन अमेरिकासँग अपिल गरेका छन्।

हमासको राजनीतिक ब्युरोका सदस्य बासेम नइमले एएफपीसँगको कुराकानीमा अमेरिका यस सम्झौताको मध्यस्थकर्ता र ग्यारेन्टर रहेको बताएका छन्। यस्तो अवस्थामा अमेरिकाले नेतान्याहु र उनको सरकारमाथि शान्ति योजनाको रोडम्याप पूर्ण रूपमा लागू गर्न दबाब दिनुपर्ने उनले बताए।

बासेम नइमले भने, ‘हामी आशा गर्छौँ कि मध्यस्थकर्ता देशहरू र अमेरिकाले बेन्जामिन नेतान्याहु र उनको सरकारमाथि दबाब सिर्जना गर्नेछन्, किनकि उनीहरू नै यस सम्झौताका ग्यारेन्टर हुन्।’

वास्तवमा इजरायली प्रधानमन्त्री बेन्जामिन नेतान्याहुले गाजालाई लिएर अमेरिकी राष्ट्रपति डोनाल्ड ट्रम्पको ‘१५-पोइन्ट प्लान’ (१५ बुँदे योजना) का सम्बन्धमा आफ्नो अडान स्पष्ट पारिसकेका छन्।

नेतान्याहुले हमासलाई पूर्ण रूपमा निरस्त्रीकरण (हतियारविहीन) नगरिएसम्म गाजाबाट इजरायली सेना फिर्ता नहुने बताएका छन्।

नेतान्याहुले आइतबार बसेको मन्त्रिपरिषद् (क्याबिनेट) बैठकमा भनेका थिए, “इजरायल १५-पोइन्ट कागजातलाई अस्वीकार गर्दछ। इजरायली सेनाले आफ्ना सैनिक र नागरिकहरूका लागि पैदा हुने खतराहरू रोक्न सैन्य कारबाही जारी राख्नेछ।”

गाजामा युद्धविरामलाई लिएर इजरायल र हमासबिच मतभेद जारी रहेकै समयमा उनको यो बयान आएको हो। दुवै पक्षबिच मुख्य गरी इजरायली सेनाको फिर्तीलाई लिएर असहमति रहँदै आएको छ।

उल्लेखनीय छ कि गत महिना ट्रम्पको ‘बोर्ड अफ पिस’ ले गाजामा हमास र अन्य सशस्त्र समूहहरूको पूर्ण निरस्त्रीकरणलाई लिएर सहमति बनेको दाबी गरेको थियो।

यद्यपि, हमासले भने यसमा फरक अडान व्यक्त गरेको थियो। इजरायलले आफ्ना सैन्य कारबाहीहरू रोकेर गाजाबाट पूर्ण रूपमा सेना फिर्ता बोलाएपछि मात्र आफूहरूले हतियार त्याग्ने हमासको भनाइ थियो।