काठमाडौं । युक्रेनका राष्ट्रपति भोलोदिमिर जेलेन्स्कीले युक्रेनी सेनाले मङ्गलवार राति नोभोरोसिस्कस्थित रुसी नौसैनिक अखडालाई लक्षित गरी एउटा ‘विशेष अपरेसन’ (विशेष अभियान) सञ्चालन गरेको दाबी गरेका छन्।

सामाजिक सञ्जाल ‘एक्स’ (ट्विटर) मा एक पोस्ट गर्दै जेलेन्स्कीले लेखेका छन्, “नोभोरोसिस्क कालो सागर (ब्ल्याक सी) मा रुसी नौसेनाको अन्तिम ठूलो र मजबुत अखडा हो र यो युद्धको अग्रिम मोर्चा (फ्रन्टलाइन) बाट ३०० किलोमिटरभन्दा बढी टाढा छ।”

उनका अनुसार युक्रेनको ‘पल्यानित्सिया’ जेट ड्रोन, ‘नेप्च्युन’ मिसाइल र मानवरहित समुद्री प्रणालीहरू (सी ड्रोन्स) ले निर्धारित निसानाहरूमा सफलतापूर्वक आक्रमण गरेका छन्। वायु रक्षा प्रणाली (एयर डिफेन्स पोजिसन्स), जहाजहरू लङ्गर लगाउने घाट र बन्दरगाहका पूर्वाधारहरूमा क्षति पुगेको पुष्टि भएको दाबी जेलेन्स्कीले गरेका छन्।

जेलेन्स्कीले युक्रेनी सेना, सुरक्षा सेवा र गुप्तचर निकायका जवानहरूलाई उनीहरूको सटीक कारबाही र उत्कृष्ट नतिजाका लागि धन्यवाद दिएका छन्।

उनले भनेका छन्, “जबसम्म रुसको आक्रामकता जारी रहनेछ, रुसी नौसैनिक बेडा र त्यसलाई सहयोग पुर्‍याउने पूर्वाधारहरू सुरक्षित रहने छैनन्। युद्धको अन्त्य गरिनुपर्छ र कूटनीतिका लागि सबै उचित प्रस्तावहरू टेबलमा उपलब्ध छन्।”