काठमाडौं । अमेरिकी राष्ट्रपति डोनाल्ड ट्रम्पलाई बैठकमा निद्रा लाग्दा वा निदाउँदा ब्युँझाउनका लागि एक महिला कर्मचारी नै काममा राखिएको अनौठो हल्ला अनलाइनमा तीव्र रूपमा फैलिरहेको छ। हालै सामाजिक सञ्जालमा एउटा भिडियो भाइरल भइरहेको छ, जसमा ट्रम्पको पछाडि एक महिला उभिएको देखिन्छ। ती ‘रहस्यमयी’ महिलालाई ट्रम्पलाई ब्युँझाउनका लागि नै तैनाथ गरिएको र उनीसँग त्यसका लागि एउटा विशेष ‘बजर’ रहेको दाबी गरिएको छ।

राष्ट्रपति ट्रम्प कार्यकक्ष वा बैठकहरूमा झुलिरहेको (उँघिरहेको) भन्दै अनलाइनमा मानिसहरूले उनको व्यङ्ग्य गरिरहेका छन्। यसअघि वर्षौँसम्म ट्रम्प आफैँ पूर्वराष्ट्रपति जो बाइडेनको कथित सुस्तताको मजाक उडाउँदै उनलाई निरन्तर ‘स्लीपी जो’ भनेर बोलाउने गर्दथे।

अहिले भने सामाजिक सञ्जालमा एउटा नयाँ सिद्धान्त (थ्योरी) तीव्र रूपमा फैलिएको छ, जसअनुसार अमेरिकी राष्ट्रपतिले एक विशेष कर्मचारी नै नियुक्त गरेका छन्। ती महिला कर्मचारीको काम महत्त्वपूर्ण बैठकहरूमा ट्रम्पलाई झ्याप्प निद्रा लाग्दा ब्युँझाउनु हो। ‘डेली स्टार’ को रिपोर्टअनुसार कैयौँ अनलाइन प्रयोगकर्ताहरूले ती महिलासँग एउटा ‘बजर’ रहेको र राष्ट्रपति निदाउन थालेपछि उनले त्यो थिच्ने गरेको दाबी गरेका छन्।

यी सबै अनौठा हल्लाहरू त्यतिबेला सुरु भए जब गत अगस्ट १० मा ओभल अफिसमा आयोजित एक कार्यक्रमका क्रममा ट्रम्पले आफ्ना आँखा खुला राख्न नसकेको वा निदाउन खोजेको जस्तो देखिने भिडियो भाइरल भयो।

Trump wakes up when she touches her belly.

Weird pic.twitter.com/qVgOtguwIQ

— Ethan Levins 🇺🇸 (@EthanLevins2) August 12, 2026

भिडियो ध्यानपूर्वक हेर्ने दर्शकहरूले के दाबी गरे भने जब-जब राष्ट्रपतिलाई निद्रा लाग्न थाल्दथ्यो, उनको पछाडि उभिएकी एक महिलाले स्पष्ट रूपमा आफ्नो पेट थिच्ने गर्दथिन्। लगत्तै ट्रम्पका आँखा खुल्दथे।

यसपछि सामाजिक सञ्जाल प्रयोगकर्ताहरूले यी दुवै घटना एकआपसमा जोडिएको भन्दै अड्कलबाजी गर्न थाले। ती रहस्यमयी महिलासँग एउटा गुप्त बजर रहेको र राष्ट्रपति बैठकमा पूर्ण रूपमा ननिदाऊन् भन्नका लागि उनलाई अघि नै ब्युँझाउन ती महिलालाई काममा राखिएको दाबी गरियो।

अनलाइन प्रयोगकर्ताहरूको यो काल्पनिक दाबीअनुसार ती महिलाले आफ्नो पेटमा एउटा बटन/बजर राखेकी छन्। जब ट्रम्प निदाएको थाहा हुन्छ, उनी आफ्नो हात चलाएर बटन थिच्छिन्, जसबाट ट्रम्प ब्युँझिन्छन्। मानिसहरूले सामाजिक सञ्जालमा ती महिलालाई ‘द ज्यापर’ नामसमेत दिएका छन्।

यद्यपि, धेरै मानिसहरूले यसलाई केवल एउटा निराधार अफवाह मात्र भनेका छन्। केही प्रयोगकर्ताहरूले यो विचारलाई पूर्ण रूपमा खारेज गर्दै यस थ्योरीमा कैयौँ त्रुटिहरू औँल्याएका छन्। एक प्रयोगकर्ताका अनुसार बजर थिच्ने भनिएकी महिला स्वयम् राष्ट्रपतिको ठ्याक्कै पछाडि उभिएकी छन्, यस्तो अवस्थामा ट्रम्पका आँखा बन्द छन् कि खुला छन् भनेर पछाडिबाट देख्नु नै असम्भव हुन्छ।

यसैबिच, भिडियोमा देखिएकी ती महिलाको पहिचान मिडिया उद्यमी तथा टिप्पणीकार २७ वर्षीया जेमी लिघ फ्र्याङ्कलिनका रूपमा भएको छ। उनी ‘द कन्जर्भेटर’ नामक वेबसाइटकी संस्थापक हुन्, जसले आफूलाई एउटा सांस्कृतिक शक्तिका रूपमा चिनाउँछ। उनले यसअघि ट्रम्प प्रशासनभित्र पनि काम गरिसकेकी छन्। यद्यपि, आफूबारे फैलिरहेका यी अफवाह र अड्कलबाजीमाथि उनले अहिलेसम्म कुनै आधिकारिक टिप्पणी गरेकी छैनन्।