काठमाडौं । जापानको राजधानी टोकियोसँग जोडिएको चिबा प्रान्तमा बिहीबार राति मात्र एक घण्टाको अवधिमा ११५ मिलिमिटर वर्षा भएको छ। यो सामान्यतया पूरा अगस्ट महिनाभरि हुने वर्षासरह हो।

मूसलधारे वर्षापछि कैयौँ क्षेत्रमा बाढी र पहिरोको स्थिति सिर्जना भएको छ, जसमा परी हालसम्म ४ जनाको मृत्यु भएको छ भने ५ जना घाइते भएका छन्।

भीषण वर्षाका कारण नारिता अन्तर्राष्ट्रिय विमानस्थलमा ७ हजार यात्रुहरू रातभर अलपत्र परेका छन् भने ४ लाखभन्दा बढी मानिसहरूलाई घर छाडेर सुरक्षित स्थानमा जान आदेश दिइएको छ।

स्थितिको गम्भीरतालाई ध्यानमा राख्दै जापान मौसम विज्ञान एजेन्सीले पहिलो पटक यस क्षेत्रका लागि ‘लेभल-५’ को सबैभन्दा उच्च सतर्कता (रेड अलर्ट) जारी गरेको छ। यो ज्यानमाथि तत्कालै गम्भीर खतरा रहेको अवस्थामा मात्र जारी गरिने सर्वोच्च तहको चेतावनी हो।

मौसम विज्ञान एजेन्सीका अनुसार तातो र ओसिलो हावा माथि रहेको चिसो हावासँग मिसिएपछि वायुमण्डल अत्यधिक अशान्त बनेको थियो, जसका कारण अचानक भीषण वर्षा भयो। विभागले शुक्रबार देर रातिसम्म पनि वर्षा जारी रहने सम्भावना व्यक्त गरेको छ।

लगातारको वर्षाका कारण धेरैजसो क्षेत्रमा बाढी र पहिरोले स्थिति बिगारेको छ। करिब ४५ हजार घरमा बिजुली सेवासमेत अवरुद्ध भएको छ भने राहत तथा उद्धार कार्यलाई तीव्र पारिएको छ। प्रभावित क्षेत्रका मानिसहरूलाई सुरक्षित स्थानमा निकाल्न जापानी सेना (सेल्फ-डिफेन्स फोर्सेज) लाई समेत तैनाथ गरिएको छ।

इचिकावा सहरमा बाढीले भरिएको सडकमा ६० देखि ७० वर्ष उमेरका एक पुरुषको शव फेला परेको छ। यस्तै, सकुरा सहरमा ६६ वर्षीया एक महिलाको मृत्यु भएको छ, जसको कार बाढीको पानीमा फसेको थियो।

यसबाहेक अन्य दुई जनाको पनि मृत्यु भएको छ। सुरुआती जानकारीअनुसार उनीहरू पनि बाढीका क्रममा आफ्ना कारहरूबाट बाहिर निस्कन नसक्दा ज्यान गुमाउन पुगेका हुन्।

चिबाका गभर्नर तोसिहितो कुमागाईले शुक्रबार बिहान पत्रकारहरूसँग कुरा गर्दै जापानको पुरानो मौसमसम्बन्धी अभिलेखलाई हेर्दा पनि यो अत्यन्तै खराब स्थिति भएको बताए। उनले भने ‘अत्यन्तै खतरनाक परिस्थिति छ। मैले जीवनमा पहिले पनि धेरै प्राकृतिक विपत्तिहरूको सामना गरेको छु, तर यस प्रकारको स्थिति पहिले कहिल्यै देखेको थिइनँ।’

कुमागाईले प्रशासनको पहिलो प्राथमिकता मानिसहरूको ज्यान जोगाउनु रहेको र उद्धार अभियान निरन्तर जारी रहने बताए। शुक्रबार वर्षाको गति केही कम भए पनि प्रशासनले अझै बाढी र पहिरोको जोखिमलाई लिएर मानिसहरूलाई सतर्क गराएको छ।

जापानको भूमि, पूर्वाधार, यातायात तथा पर्यटन मन्त्रालयका अधिकारी काजुहितो सिमामोटोले बाढीको जोखिम बढी भएका क्षेत्रका बासिन्दाहरूलाई आफ्नो सुरक्षाका लागि आवश्यक सबै कदम चाल्न आग्रह गरेका छन्। उनले मानिसहरूलाई स्थानीय प्रशासनको स्थानान्तरण आदेशको पालना गर्न र खतरा बढ्नुअघि नै सुरक्षित स्थानतर्फ जान अपिल गरे।

मौसम विशेषज्ञहरूका अनुसार जलवायु परिवर्तनका कारण जापानमा अत्यधिक वर्षा र अन्य खतरनाक मौसमी घटनाहरू तीव्र रूपमा बढिरहेका छन्। विगत १५ दिनभित्र मात्रै जापानले एकपछि अर्को गर्दै ‘डल्फिन’, ‘चान-होम’ र ‘पिलौ’ गरी ३ वटा ठूला समुद्री आँधीको सामना गरिसकेको छ।

यसैका कारण धेरै सहरहरूमा कीर्तिमानी वर्षा, पहिरो र भीषण बाढीजस्तो स्थिति उत्पन्न भएको छ। ओकिनावादेखि टोकियोसम्मको जनजीवन ठप्प भएको छ, उडानहरू रद्द गरिएका छन् भने हजारौँ घरहरू अन्धकारमय बनेका छन्।