काठमाडौं । मेक्सिकोमा एउटा चर्चको छत खस्दा सात जनाको मृत्यु भएको छ । यो भग्नावशेषमा अझै ३० जना फसेका छन् । भग्नावशेषमा केही बालबालिका पनि पुरिएको हुनसक्ने आशंका छ ।

मानिसलाई बाहिर निकाल्ने काम तीव्र गतिमा भइरहेको छ । स्थानीय सञ्चारमाध्यमले दश जनालाई भग्नावशेषबाट निकालेर अस्पताल लगिएको जनाएको छ । यो दुर्घटना सिउदेद मदेरोमा भएको थियो, जहाँ सान्ता क्रुज चर्चको छत खसेको थियो।

तटीय प्रान्त तामौलिपासका प्रहरीले छत खस्दा चर्चमा भएको सामूहिक प्रार्थना सभामा करिब १०० जना उपस्थित रहेको बताएको छ । सामाजिक सञ्जालमा देखा परेका तस्बिरहरूले देखाएअनुसार मानिसहरू बेल्चा र कोदालोले अवशेष हटाउन प्रयास गरिरहेका छन्।

तस्बिरहरूले आपतकालीन सेवाहरूसँग सम्बन्धित व्यक्तिहरू र गाडीहरू चर्च नजिक आइपुगेको देखाउँछन्। अधिकारीहरूले चर्च वरपर पूर्ण शान्ति कायम गर्न निर्देशन दिए ताकि भग्नावशेषमा दबिएका मानिसहरूको आवाज सुन्न सकियोस्।