काठमाडौं । बेलायतका विदेशमन्त्री जेम्स क्लेभरली इजरायल पुगेका छन् । एक सरकारी प्रवक्ताले भने, “परराष्ट्रमन्त्री हमासको आक्रमणपछि इजरायलका जनतासँग ऐक्यबद्धता व्यक्त गर्न आज इजरायल आइपुगेका छन्।”

उनले आक्रमणबाट प्रभावित जनता र इजरायलका नेताहरुलाई भेट्ने बताए ।

हमासले शनिबार इजरायलमा गरेको आक्रमणपछि इजरायलमा सयौंको मृत्यु भइसकेको छ । इजरायली सेनाका अनुसार १२ सय जनाको मृत्यु भएको छ भने २७ सयभन्दा बढी घाइते भएका छन् ।

यसैबीच प्यालेस्टिनी स्वास्थ्य मन्त्रालयले गाजामा जारी इजरायली आक्रमणमा मृत्यु हुनेको संख्या १०५५ पुगेको जनाएको छ ।

इजरायलमा हमासको आक्रमणपछि बेलायतको बयान पनि आएको छ । बेलायतले भनेको छ, “इजरायलमा हमास आतंककारीले गरेको आक्रमणबाट हामी स्तब्ध भएका छौं। इजरायललाई आफ्नो रक्षा गर्ने पूर्ण अधिकार छ। हामी इजरायली अधिकारीहरूसँग सम्पर्कमा छौं।”