काठमाडौं । युक्रेनको गुप्तचर एजेन्सीका प्रमुख लेफ्टिनेन्ट जनरल किरिलो बुडानोभाकी श्रीमतीको हत्या गर्ने प्रयास भएको छ । युक्रेनी समाचार वेबसाइट बाबेलका अनुसार मारियाना बुडानोभालाई मंगलबार विष दिइएको थियो, त्यसपछि उनलाई अस्पतालमा भर्ना गरिएको थियो। हाल युक्रेनको गुप्तचर एजेन्सीले यस विषयमा कुनै बयान दिएको छैन।

स्थानीय मिडियाका अनुसार धेरै गुप्तचर अधिकारीहरू (गोप्य एजेन्टहरू) लाई मार्ने प्रयास पनि गरिएको छ। उनीहरूलाई पनि विष दिइएको छ । यद्यपि, रिपोर्टले लेफ्टिनेन्ट जनरल किरिलो बुडानोभालाई पनि निशाना बनाएको थियो वा थिएन भन्ने जानकारी दिएको छैन। कसले विष खुवायो भन्ने बारे भने कुनै जानकारी दिइएको छैन । रिपोर्टले यसमा रुसको संलग्नता पनि उल्लेख गरेको छैन ।

एक अधिकारीले नाम न छाप्ने सर्तमा युक्रेनी समाचार वेबसाइट बाबेललाई बताएअनुसार मारियानालाई विष दिएका पदार्थहरू दैनिक जीवनमा वा सैन्य अपरेशनहरूमा कुनै पनि हिसाबले प्रयोग हुँदैनन्।

समाचार वेबसाइट युक्रेनस्का प्राभ्दाले आफ्नो स्रोतलाई उद्धृत गर्दै मारियाना अस्पतालमा भर्ना भएपछि उनको परीक्षण गरिएको बताएको छ। परीक्षण रिपोर्टले उनलाई विष खुवाइएको पुष्टि गरेको छ । रिपोर्टमा उनको खानामा विष मिसाइएको पनि उल्लेख छ ।