काठमाडौं। रियल म्याड्रिड कोप डेल रे बाट बाहिरिएको छ। गएराति सम्पन्न राउण्ड १६ को खेलमा एटलेटिको म्याड्रिडले रियल म्याड्रिडलाई ४-२ गोल अन्तरले पराजित गर्दै क्वाटरफाइनलमा पुगेको हो।

निर्धारित ९० मिनेटको खेलमा २-२ गोलको बराबरी भएपछि खेल ३० मिनेट अतिरिक्त समय खेलाइएको थियो। अतिरिक्त समय एटलेटिको म्याड्रिडले २ गोल गरेपछि खेल ४-२ ले जितेको थियो।

एटलेटिको म्याड्रिडको जितमा सामुएल लिनो, अल्भारो मोराटा, एन्टोनी ग्रीजम्यान र रोड्रीगो रिक्वेलमीले एक एक गोल गरेका थिए। त्यस्तै रियल म्याड्रिडका लागि एक गोल जोसेलुले गरेका थिएभने एक गोल एटलेटिकोका जान ओब्लाकले आत्मघाती गोल गरेका थिए।

योसँगै यस सिजनको कोपा डेल रे को क्वाटरफाइनलमा पुग्ने ८ क्लबको टुंगो लागेको छ। जसमा एटलेटिको म्याड्रिडसहित बार्सिलोना, एथलेटिक बिल्बाओ, सेल्टा भिगो, गिरोना, मल्लोर्का, रियल सोसियडाड र सेभिया रहेका छन्।