काठमाडौं । ओमानको मध्यस्थतामा अप्रिल १२, शनिबार इरान र अमेरिकाबीच अप्रत्यक्ष वार्ता भएको छ। दुवै देशका प्रतिनिधिमण्डलबीचको यो अप्रत्यक्ष वार्ता ओमानको राजधानी मस्कटमा भएको थियो।

इरानको आणविक कार्यक्रमको सम्बन्धमा २०१८ पछि दुई देशबीच भएको यो उच्चस्तरीय बैठक थियो। दुवै देशले पहिलो चरणको बैठकलाई ‘रचनात्मक’ भनेका छन्। दोस्रो चरणको छलफल अर्को हप्ता हुनेछ।

अमेरिकी प्रतिनिधिमण्डलको नेतृत्व अमेरिकी राष्ट्रपति डोनाल्ड ट्रम्पका विशेष दूत स्टिभ विटकफले गरेका थिए। इरानी प्रतिनिधिमण्डलको नेतृत्व इरानका विदेशमन्त्री अब्बास अराघचीले गरेका थिए ।

बैठक छुट्टाछुट्टै कोठामा आयोजना गरिएको थियो जसमा ओमानका विदेशमन्त्री बद्र बिन हम्माद अल-बुसैदी मार्फत दुवै देशका प्रतिनिधिहरूलाई सन्देश पठाइएको थियो।

यद्यपि, बुसैदीको उपस्थितिमा अराघची र विटकफले केही मिनेट कुराकानी गरे।

वार्तापछि अब्बास अराघचीले इरानी सरकारी टिभीलाई भने, “मेरो विचारमा, पहिलो बैठकको रूपमा यो रचनात्मक बैठक थियो जुन धेरै शान्तिपूर्ण र सम्मानजनक वातावरणमा सम्पन्न भयो किनभने कुनै अनुपयुक्त भाषा प्रयोग गरिएको थिएन।”

ह्वाइट हाउसले एक विज्ञप्तिमा भनेको छ कि वार्ता ‘धेरै सकारात्मक र रचनात्मक’ थियो।