काठमाडौं । रुसको शीर्ष सुरक्षा एजेन्सी ‘फेडरल सेक्युरिटी सर्भिस’ ले म्यासेजिङ एप टेलिग्रामका संस्थापक तथा मुख्य कार्यकारी अधिकृत पावेल डुरोभ विरुद्ध आतङ्कवादी गतिविधिलाई प्रोत्साहन दिएको अभियोगमा आपराधिक मुद्दा दर्ता गरेको छ। एफएसबीले डुरोभको गिरफ्तारीका लागि अन्तर्राष्ट्रिय वारेन्ट समेत जारी गरेको छ।

यद्यपि, यो विषयमा डुरोभ वा टेलिग्रामको आधिकारिक टोलीका तर्फबाट हालसम्म कुनै तत्काल प्रतिक्रिया आएको छैन। एफएसबीका अनुसार, युक्रेनी विशेष गुप्तचर सेवा तथा विभिन्न आतङ्कवादी र उग्रवादी सङ्गठनहरूले रुलभित्र तोडफोड, आतङ्कवाद, सामूहिक हत्या र साइबर-ठगी जस्ता आपराधिक गतिविधिहरूको तयारी तथा समन्वयका लागि टेलिग्रामको प्रयोग गरिरहेका थिए। टेलिग्रामले त्यस्ता सामग्री तथा च्यानलहरूलाई हटाउन अस्वीकार गरेकाले डुरोभमाथि यो मुद्दा चलाइएको रुसी निकायको दाबी छ।

सन् २०१३ मा सञ्चालनमा आएको ‘इन्क्रिप्टेड’ म्यासेजिङ एप टेलिग्रामका विश्वभर १ अर्बभन्दा बढी प्रयोगकर्ताहरू रहेका छन्। जारी रुस-युक्रेन युद्धका क्रममा दुवै पक्षका सैन्य तथा नागरिकहरूद्वारा सूचना आदानप्रदानका लागि यसको व्यापक प्रयोग भइरहेको छ।

रुसले पछिल्ला वर्षहरूमा टेलिग्रामको प्रयोगलाई नियन्त्रण वा प्रतिबन्ध गर्ने प्रयास गर्दै आफ्नै राज्य-समर्थित ‘म्याक्स’ नामक म्यासेजिङ सेवालाई प्रवर्द्धन गर्दै आएको छ।

रुसमा जन्मेका पावेल डुरोभसँग हाल संयुक्त अरब इमिरेट्स र फ्रान्सको नागरिकता (पासपोर्ट) रहेको छ। सन् २०१४ मा रुसी अधिकारीहरूको तीव्र राजनीतिक दबाबपछि उनले आफ्नो पहिलो चर्चित सोसल प्लेटफर्म ‘भिकोन्ताक्ते’ को शेयर बेचेर रुस छाडेका थिए।

यसअघि फ्रान्सेली अधिकारीहरूले पनि डुरोभविरुद्ध टेलिग्राम प्लेटफर्ममा हुने बाल यौन शोषण, लागूऔषध कारोबार र साइबर अपराध जस्ता गैरकानुनी गतिविधिहरू रोक्न नसकेको तथा अनुसन्धान एजेन्सीहरूलाई सहयोग नगरेको अभियोगमा छानबिन गरिरहेका छन्। यद्यपि, डुरोभले आफ्नो प्लेटफर्मको कुनै पनि गैरकानुनी वा आपराधिक काममा दुरुपयोग नभएको दाबी गर्दै आएका छन्।