काठमाडौं । जर्मनीको विलासी कार निर्माता कम्पनी बीएमडब्ल्यु ले सन् २०२७ को अन्त्यसम्ममा विश्वभरबाट करिब ८,००० कर्मचारी कटौती गर्ने तयारी गरेको छ। अन्तर्राष्ट्रिय सञ्चारमाध्यमहरूका अनुसार बढ्दो उत्पादन लागत र चीनको बजारमा कार बिक्रीमा आएको गिरावटका कारण कम्पनीले आफ्नो कुल विश्वव्यापी जनशक्तिको करिब ५ प्रतिशत हिस्सा घटाउन लागेको हो।

यस कटौतीको सबैभन्दा ठूलो असर जर्मनीमा कार्यरत कर्मचारीहरूमाथि पर्ने सम्भावना छ। रिपोर्ट अनुसार कम्पनीले आउँदो अक्टोबर महिनादेखि स्वेच्छिक कर्मचारी कटौती कार्यक्रम सुरु गर्न सक्छ, जुन सन् २०२७ सम्म जारी रहनेछ। यस योजनाअन्तर्गत अनुसन्धान, विकास, योजना र अन्य कर्पोरेट विभागका कर्मचारीहरूलाई स्वेच्छिक अवकाशको प्रस्ताव गरिनेछ। यद्यपि, प्रत्यक्ष उत्पादनमा खटिने कारखानाका श्रमिकहरूलाई भने यो योजनामा समावेश गरिने छैन।

सन् २०२५ को अन्त्यसम्मको तथ्याङ्क अनुसार जर्मनीमा मात्रै बीएमडब्ल्युका ८७,४३६ जना कर्मचारी कार्यरत थिए, जुन कम्पनीको कुल विश्वव्यापी जनशक्तिको आधाभन्दा बढी हो। कम्पनीले यसअघि नै सन् २०२४ को तुलनामा आफ्ना कर्मचारीको सङ्ख्या २.३ प्रतिशतले घटाइसकेको छ।

हाल समग्र जर्मन अटोमोबाइल उद्योग नै ठूलो आर्थिक दबाब र सङ्कटबाट गुज्रिरहेको छ। बीएमडब्ल्यु बाहेक अर्को चर्चित कार निर्माता कम्पनी पोर्सेले पनि सन् २०३५ सम्म थप ५,००० रोजगारी कटौती गर्ने घोषणा गरिसकेको छ भने फोक्सवागनले पनि ठूलो परिमाणमा कर्मचारी घटाउने विषयमा विचार गरिरहेको छ।