बर्लिन। अमेरिकी राष्ट्रपति डोनाल्ड ट्रम्पले इरानलाई युद्धविरामका सर्तहरू स्वीकार गर्न बाध्य पार्ने उद्देश्यले केही दिनभित्रै इरानी ऊर्जा पूर्वाधार र तेल सुविधाहरूमा हवाई आक्रमण गर्ने योजना बनाइरहेको अमेरिकी सञ्चारमाध्यमहरूले जनाएका छन्। अर्कोतर्फ, इरानले पनि सम्भावित आक्रमणको कडा प्रतिवाद गर्न ‘व्यापक’ जवाफी योजना तयार पारेको दाबी गरेको छ।

अमेरिकी समाचार पोर्टल एक्सियोस र वाल स्ट्रिट जर्नलका अनुसार, जारी युद्धविराम वार्ताका बीच तेहरानमाथि दबाब बढाउन अमेरिकी र इजरायली सेनाले संयुक्त सैन्य अभियानको तयारी गरिरहेका छन्।

सिबीएस न्युजले पेट्रोलियम सुविधा तथा पावर प्लान्टहरूलाई लक्षित गरी आक्रमणको समन्वय भइरहेको जनाए पनि ह्वाइट हाउसका केही सहयोगीहरूको आपत्तिका कारण राष्ट्रपति ट्रम्पले अन्तिम स्वीकृति दिन बाँकी रहेको उल्लेख गरेको छ।

ट्रम्पको चेतावनी र इजरायली समन्वय

इजरायली प्रधानमन्त्री बेन्जामिन नेतान्याहूले वासिङ्टनमा राष्ट्रपति ट्रम्प र अमेरिकी रक्षा सचिव पीट हेग्सेथसँग छलफल गरेलगत्तै यी समाचारहरू बाहिर आएका हुन्। राष्ट्रपति ट्रम्पले शनिबार टिप्पणी गर्दै होर्मुजको जलमार्गमा व्यापारिक जहाजहरूमाथिको आक्रमण नरोकिए इरानका पुल र पावर प्लान्टहरू नष्ट गरिदिने चेतावनी दिँदै आसन्न सैन्य कारबाहीको सङ्केत दिएका छन्।

मध्यपूर्वी क्षेत्रमा तैनाथ अमेरिकी सेनामाथि आक्रमण बढेपछि इरान ‘अझ बढी आक्रामक’ बनेको अमेरिकी अधिकारीहरूको आँकलन छ। विगत पाँच महिनाभन्दा बढी समयदेखि इरान, इजरायल र अमेरिकाबीच कूटनीतिक वार्ताका साथसाथै सैन्य तनाव जारी छ।

इरानको कडा जवाफी तयारी

इरानी समाचार एजेन्सी तस्नीमका अनुसार, इरानले अमेरिकी र इजरायली आक्रमणको सम्भावनालाई ध्यानमा राख्दै कडा प्रतिक्रियाको योजना बनाएको छ। एक वरिष्ठ सुरक्षा अधिकारीलाई उद्धृत गर्दै इरानले आक्रमण भएमा मध्यपूर्वमा रहेका महत्वपूर्ण इजरायली पूर्वाधार र अमेरिकी ऊर्जा सुविधाहरूलाई सोझै निशाना बनाउने चेतावनी दिएको छ।

साथै, इरानको सर्वोच्च राष्ट्रिय सुरक्षा परिषद्का सचिव मोहम्मद बकर जोलकादरले अमेरिकाले नौसैनिक नाकाबन्दी र आक्रमण जारी राखेमा रणनीतिक रूपमा महत्त्वपूर्ण ‘स्ट्रेट अफ होर्मुज’ (होर्मुज जलडमरूमध्य) पूर्ण रूपमा बन्द गरिदिने र थप तनाव सिर्जना हुने स्पष्ट पारेका छन्।