काठमाडौं । इजिप्टका विभिन्न क्षेत्रहरूमा सोमबार बिहानै भूकम्पको धक्का महसुस गरिएको छ। भूमध्यसागरलाई केन्द्रविन्दु बनाएर ५.४ म्याग्निच्युडको भूकम्प गएपछि तटीय तथा आसपासका सहरहरू थर्किन पुगेका हुन्।

जर्मनीको भू-विज्ञान अनुसन्धान केन्द्र (जीएफजेड) का अनुसार भूकम्पको केन्द्रविन्दु समुद्रको सतहभन्दा करिब १० किलोमिटर गहिराइमा रहेको थियो। बिहानै गएको भूकम्पका कारण सर्वसाधारणमा त्रास फैलिएपछि सुरक्षा निकाय तथा राहत एजेन्सीहरू तत्काल आपत्कालीन तयारीका साथ सतर्क अवस्थामा खटिएका छन्।

रेड क्रिसेन्टद्वारा आपत्कालीन योजना सक्रिय भूकम्पको धक्का महसुस गरिएका प्रान्तहरूमा इजिप्टियन रेड क्रिसेन्टले आफ्नो आपत्कालीन प्रतिक्रिया योजना तत्काल सक्रिय बनाएको छ। रेड क्रिसेन्टले दिएको प्रारम्भिक जानकारीअनुसार भूकम्पका कारण हालसम्म कुनै पनि मानवीय क्षति वा भौतिक सम्पत्तिमा ठूलो नोक्सानी भएको खबर प्राप्त भएको छैन।

यद्यपि, स्थितिमाथि निरन्तर निगरानी राखिइरहेको छ। रेड क्रिसेन्टले सर्वसाधारणलाई भौतिक क्षति वा संरचनात्मक कमजोरी देखिएका भवन तथा भौतिक संरचनाहरूबाट टाढा रहन अपिल गरेको छ। साथै, नागरिकहरूलाई कुनै पनि भ्रामक अफवाहको पछि नलागी केवल सरकारी एजेन्सीहरू र आधिकारिक स्रोतहरूबाट जारी गरिएका सूचना र निर्देशनहरूको मात्र पालन गर्न भनिएको छ।

यसैबिच इजिप्टका अधिकारीहरूले भूकम्पको केन्द्रविन्दुबारे संशोधित विवरण सार्वजनिक गरेका छन्। नयाँ जानकारीअनुसार भूकम्पको केन्द्रविन्दु इजिप्टको स्वेज सहरबाट करिब ३८ किलोमिटर टाढा भूमध्यसागरीय क्षेत्रमा रहेको स्पष्ट पारिएको छ। प्रशासनले हाल परिस्थिति पूर्ण रूपमा नियन्त्रणमा रहेको र सम्भावित जोखिमलाई ध्यानमा राख्दै उच्च निगरानी जारी राखिने जनाएको छ। प्रभावित क्षेत्रहरूमा प्राविधिक तथा उद्धार टोलीहरूले भूकम्पको प्रभाव र क्षतिको विस्तृत मूल्याङ्कन गर्न सर्भेक्षण कार्य जारी राखेका छन्।