काठमाडौं। इजरायलका प्रधानमन्त्री बेन्जामिन नेतन्याहुले हमास पूर्ण रूपमा निःशस्त्र नभएसम्म गाजा क्षेत्रबाट इजरायली सेना फिर्ता नगर्ने स्पष्ट पारेका छन्। उनले इजरायली सेनालाई आफ्नो सुरक्षा, भूभाग र नागरिकको संरक्षणका लागि आवश्यक सबै कदम चाल्न स्पष्ट निर्देशन दिइसकेको समेत जानकारी दिएका छन्।

मंगलबार सामाजिक सञ्जालमार्फत सार्वजनिक गरिएको एक भिडियो सन्देशमा प्रधानमन्त्री नेतन्याहुले इजरायल डिफेन्स फोर्स (आईडीएफ) का सैनिकहरूलाई आवश्यकताअनुसारका सबै उपाय अपनाउन निर्देशन दिइएको उल्लेख गरेका छन्।

अमेरिकी राष्ट्रपति डोनाल्ड ट्रम्पले बिहीबार गाजामा हमाससहित अन्य सशस्त्र समूहको पूर्ण निःशस्त्रीकरण गर्ने उद्देश्यले तथाकथित ‘बोर्ड अफ पिस’ ले तयार पारेको सम्झौताको मस्यौदा सार्वजनिक गरेका थिए।

उक्त प्रस्तावबारे प्रतिक्रिया दिँदै नेतन्याहुले अमेरिकाले मस्यौदा पठाएको भए पनि इजरायलले त्यसमा पूर्ण सहमति नजनाएको स्पष्ट पारे। उनले अमेरिकाले पठाएको मस्यौदा इजरायलको नभएकाले त्यसमा आफ्ना तर्फबाट टिप्पणीहरू पठाइसकिएको बताएका छन्।

यसअघि ट्रम्पले घोषणा गरेको सम्झौतापछि हमासले गाजा युद्धविराम सम्झौताको दोस्रो चरणका लागि तयार पारिएको पछिल्लो कार्ययोजनामा सहमति जनाएको बताएको थियो। तर, हमासले हतियार व्यवस्थापनको विषयमा केही सर्तहरू अघि सारेको छ।

इजरायली आक्रमण पूर्ण रूपमा रोकिनुपर्ने, गाजाबाट इजरायली सेना फिर्ता हुनुपर्ने र पुनर्निर्माण प्रक्रियामा ठोस प्रगति हुनुपर्ने जस्ता सर्तहरू पूरा भएपछि मात्र हतियारसम्बन्धी व्यवस्थालाई अघि बढाउन सकिने हमासको अडान छ।

यसैबीच, पछिल्ला दिनहरूमा गाजामा भएका इजरायली हवाई आक्रमणमा दर्जनौँ मानिसको मृत्यु भएको समाचार सार्वजनिक भएको छ, जसमा बालबालिका तथा अन्य सर्वसाधारणसमेत परेका छन्।

घटनापछि गाजा युद्धविराम वार्तामा मध्यस्थता गर्दै आएका मुलुकहरू कतार, इजिप्ट र टर्कीले सोमबार संयुक्त विज्ञप्ति जारी गर्दै इजरायली आक्रमणको तीव्र निन्दा गरेका छन्। उनीहरूले युद्धविराम प्रक्रियालाई कमजोर पार्ने कुनै पनि किसिमका गतिविधि रोक्न सम्बन्धित पक्षहरूसँग आग्रह गरेका छन्।

गाजामा जारी द्वन्द्व अन्त्यका लागि विभिन्न चरणमा वार्ताहरू भइरहे तापनि सेना फिर्ता, हमासको हतियार व्यवस्थापन र गाजाको पुनर्निर्माण जस्ता मुख्य विषयहरूमा इजरायल र हमासबीच अझै पनि गहिरो मतभेद कायम रहेको छ।