काठमाडौं । भारतीय क्रिकेट कन्ट्रोल बोर्डले १९ औं एसियाली खेलकुदका लागि क्रिकेट टोलीको घोषणा गरेको छ ।

टिमको कप्तानी ऋतुराज गायकवाडलाई दिइएको छ । सेप्टेम्बर २८ देखि अक्टोबर ८ सम्म चल्ने एसियाली खेलकुदमा टी–२० फर्म्याटका क्रिकेट खेलहरु हुनेछन् ।

अक्टोबर ५ बाट सुरु हुने एकदिवसीय विश्वकपका कारण यस प्रतियोगिताका लागि युवा खेलाडी छनोट गरिएको हो ।

यो टोलीमा ऋतुराज गायकवाड बाहेक तिलक वर्मा र रिंकु सिंह पनि छन् ।

भारतीय टोलीमा ऋतुराज गायकवाड, यशस्वी जैसवाल, राहुल त्रिपाठी, तिलक वर्मा, रिंकु सिंह, जितेश शर्मा, वाशिंगटन सुन्दर, शाहबाज अहमद, रवि बिश्नोई, आवेश खान, अर्शदीप सिंह, मुकेश कुमार, शिवम मावी, शिवम दुबे र प्रभसिमरन सिंह (विकेटकीपर) छन् ।

स्ट्यान्डबाइ खेलाडीहरू यश ठाकुर, साई किशोर, वेंकटेश अय्यर, दीपक हुड्डा र साई सुदर्शन छन् ।

१६औँ एसियाली खेलकुददेखि क्रिकेटलाई औपचारिक रूपमा समावेश गरिएको छ । यी खेलहरू १२ देखि २७ नोभेम्बर २०१० सम्म चीनको ग्वाङ्झाउ शहरमा आयोजित भएका थिए।

त्यसमा भारत, पाकिस्तान, बंगलादेश र श्रीलंका गरी चार एसियाली टोली सहभागी थिए। यस संस्करणमा भने नेपालले पनि पुरुष क्रिकेटमा सहभागिता जनाउँदैछ ।