काठमाडौं । इरानले बुधबार एउटा इमेजिङ स्याटेलाइट सफलतापूर्वक प्रक्षेपण गरेको दाबी गरेको छ ।

इरानको यस्तो कदमले पश्चिमी देशसँगको तनाव झनै बढाउन सक्छ । पश्चिमी देशहरूले इरानले आणविक हतियार बनाउन अन्तरिक्ष प्रविधिको प्रयोग गर्न सक्ने डर छ।

इरानी समाचार एजेन्सी इरनाको समाचार अनुसार इरानका सञ्चार मन्त्री एसा जरेपुरले भने, “नूर-३ उपग्रहलाई पृथ्वीको सतहबाट ४५० किलोमिटरको दूरीमा अन्तरिक्षमा राखिएको छ।”

यद्यपी इरानले यो स्याटेलाइट कहिले प्रक्षेपण गरेको हो भन्ने स्पष्ट भइसकेको छैन । इमेजिङ स्याटेलाइट नूर–३ ले पृथ्वीको सतहबाट ४५० किलोमिटरको दूरीमा परिक्रमा गर्नेछ ।

अमेरिकी सेनाले यस्तै लामो दुरीको ब्यालिस्टिक टेक्नोलोजीले इरानलाई आणविक हतियार सहित लामो दुरीका हतियारहरू विकास गर्न मद्दत गर्ने बताएको छ। इरानको मिसाइल कार्यक्रम मध्यपूर्वका देशहरूमध्ये सबैभन्दा ठूलो हो।