काठमाडौं । वेस्ट इन्डिजका अल्जारी जोसेफ रनआउट भएपछि पनि नटआउट घोषित भएपछि विवाद उत्पन्न भयो । वास्तवमा, अम्पायरले जोसेफलाई आउट दिएनन् किनभने अष्ट्रेलियाका फिल्डरहरूले उनको रनआउट पछि अपील गरेनन्।

अष्ट्रेलिया र वेस्ट इन्डिजबीच आइतबार एडिलेडमा दोस्रो टी–२० खेल भएको थियो । दोस्रो इनिङ्सको १९ औं ओभरमा अस्ट्रेलियाका स्पेन्सर जोन्सन बलिङ गर्दै थिए । ओभरको दोस्रो बलमा अल्जारी जोसेफले कभरतर्फ शट खेले र रनका लागि दौडे। उनले अर्को छेउमा पुग्नुअघि नै जोन्सनले विकेट छिन्नभिन्न पारे ।

रिप्लेले जोसेफ क्रिजबाट टाढा रहेको देखाएको छ । यो देखेर अष्ट्रेलियाका खेलाडीहरुले खुसी मनाउन थाले तर अम्पायरले ब्याट्सम्यानलाई नटआउट घोषित गरे । उनले अष्ट्रेलियाका खेलाडीले विकेटका लागि अपिल नगरेकाले ब्याट्सम्यान आउट हुन नसक्ने बताए ।

अम्पायरको निर्णयमा अस्ट्रेलियाका खेलाडीहरु रिसाए । स्टम्प माइकमा एक खेलाडीले यो बकवास हो भन्दै गरेको रेकर्ड गरिएको थियो। तर, यो निर्णयले खेलको नतिजामा कुनै प्रभाव पारेन र अष्ट्रेलियाले खेल ३४ रनले जित्यो । यस खेलमा ग्लेन म्याक्सवेलले ५५ बलमा १२० रनको इनिङ खेले ।

अष्ट्रेलियाले टी–२० सिरिज पनि कब्जा गरेको छ । तीन खेलको टी–२० सिरिजमा अस्ट्रेलियाले शुरुका दुवै टी–२० खेल जितेर २–० को अग्रता लिएको छ । यसअघि अष्ट्रेलियाले ३ एकदिवसीय सिरिजमा क्लिन स्वीप गरेको थियो । दुई टेष्ट शृंखला १-१ को बराबरीमा सकिएको थियो ।

खेलमा ग्लेन म्याक्सवेलले आफ्नो पाँचौं टी-२० अन्तर्राष्ट्रिय शतक प्रहार गरे। योसँगै उनले भारतीय कप्तान रोहित शर्माको बराबरी गरेका छन् । दुवै खेलाडीको नाममा अहिले टी–२० अन्तर्राष्ट्रियमा ५–५ शतक छ ।

म्याक्सवेलले टी–२० अन्तर्राष्ट्रियमा सबैभन्दा छिटो ५ शतक प्रहार गर्ने कीर्तिमान बनाएका छन् । म्याक्सवेलले आफ्नो १०२ औं खेलमा यो उपलब्धि हासिल गरेका छन् भने रोहितले १५१ खेलमा यो उपलब्धि हासिल गरेका छन् ।