क्रिकेट विश्वकपअघि अनलाइन सट्टेबाजीमा कडाइ, मिडिया हाउसलाई यस्तो निर्देशन
काठमाडौं । भारतको केन्द्र सरकारले मिडिया संगठनहरूलाई अनलाइन सट्टेबाजी प्लेटफर्मको विज्ञापन प्रकाशित नगर्न वा नदेखाउन निर्देशन दिएको छ।
समाचार एजेन्सी पीटीआईका अनुसार केन्द्र सरकारले शुक्रबार यो आदेश जारी गरेको हो ।
सूचना तथा प्रसारण मन्त्रालयले पत्रपत्रिका, टेलिभिजन च्यानल, डिजिटल मिडिया, सामाजिक सञ्जाललाई कुनै पनि रुपमा सट्टेबाजी र जुवा खेल्ने मञ्चको विज्ञापन/प्रवर्द्धन नगर्न निर्देशन दिएको छ ।
पालना नगरे उपयुक्त कारबाही गरिने आदेशमा भनिएको छ ।
कुनै पनि ठूला खेलकुद, विशेषगरी क्रिकेटको समयमा यस्ता सट्टेबाजी र जुवा खेल्ने मञ्चलाई प्रवद्र्धन गर्ने प्रवृति रहेको उनीहरुले फेला पारेको मन्त्रालयको भनाइ छ र अबको केही दिनमा यस्तै एउटा महत्वपूर्ण अन्तर्राष्ट्रिय प्रतियोगिता सुरु हुन लागेको छ ।
मुलुकमा विश्वकप क्रिकेट आयोजना हुन लागेको अवस्थामा मन्त्रालयको यो निर्देशन आएको हो ।
मन्त्रालयले आफ्नो आदेशमा यो प्रणालीको मनी लान्ड्रिङ नेटवर्कसँग सम्बन्ध रहेको र यसले देशको आर्थिक सुरक्षामा खतरा हुने समेत जनाएको छ ।
Facebook Comment