‘अनेकौँका दृष्टिमा राष्ट्रनिर्माता’ पुस्तक विमोचन

काठमाडौं । नेपाल एकीकरणका मुख्य पात्र राजा पृथ्वीनारायण शाहको जीवनीमा आधारित पुस्तक ‘अनेकौँका दृष्टिमा राष्ट्रनिर्माता’को आज काठमाडौँमा लोकार्पण गरिएको छ । विभिन्न विधाका ४ सय ४३ लेखकको लेख समेटिएको १ हजार ४ सय ४ पृष्ठ लामो उक्त पुस्तक काठमाडौँमा आज प्रधानसेनापति पूर्णचन्द्र थापाले लोकार्पण गर्नुभयो । हरिप्रसाद सोडारीको प्रधान सम्पादकत्वमा निर्माण भएको पुस्तकको मूल्य रु पाँच हजार राखिएको छ । आज लोकार्पणको दिनमा विशेष छुटसहित दुई हजारमा बिक्री गरिएको थियो ।

कार्यक्रममा प्रधानसेनापति थापाले गोरखा राज्यका राजा पुथ्वीनारायण शाहको दुरदृष्टि र दशकौँको मेहनतबाट हासिल भएको सफलताले नेपाल निर्माण भएकाले सबै नेपालीका लागि प्रेरणाको रुपमा रहेको बताए । उनले अख्तियार गरेको रणनीति र शासन प्रणाली तथा दिव्योपदेश आज पनि उत्तिकै सान्दर्भिक रहेको प्रधानसेनापति थापाले उल्लेख गरे।

नेपाली नागरिकलाई एकीकरण अभियानको भौतिक अनुभूति प्रदान गर्दै राष्ट्रिय एकता अभिवृद्धि गर्ने अभिप्रायका साथ नेपाली सेनाको पहलमा एकीकरण मार्ग कार्यक्रम थालिएको जानकारी दिँदै थापाले नेपाल एकीकरणका दौरान प्रयोग भएका पदमार्ग र एकीकरण अभियानसँग सम्बन्धित इतिहास र ऐतिहासिक धरोहरको संरक्षण र प्रवद्र्धनका कार्यक्रम सेनाबाट शुरु गरिएको बताए।

समारोहमा पुस्तकका प्रधानसम्पादक सोडारीले पृथ्वीनारायण शाह योद्धाका रूपमा मात्रै नभइ सैनिकको मनोबल कसरी बढाए, विद्धानलाई कसरी उपयोग गरे, जनतालाई कसरी उत्साहित बनाए भनेर पुस्तकमा समावेश गरिएको बताए। आफ्नो कालमा केही त्रुटी गरेपनि नेपाल एकीकरणमा महत्वपूर्ण योगदान गरेकाले उहाँको बहुआयामिक पक्ष पुस्तकमा समेटिएको उनले जानकारी गराए। इतिहासकार दिनेशराज पन्तले नेपालको पुनःएकीकरणको काम पुथ्वीनारायण शाहले गरेकाले आज हामी नेपाली भनेर शिर ठाडो बनाउन सकिएको उल्लेख गर्दै यो पुस्तक हरेक नेपालीका लागि उत्तिकै महत्वको रहेको बताए।

कार्यक्रममा पूर्व रथि अमर पन्तले नेपाललाई साझा फूलबारी बनाउने पृथ्वीनारायण शाह बहुआयामिक व्यक्ति भएको भन्दै इतिहासलाई जीवन्त राख्ने काम पुस्तकले गरेको बर्ताए । उनले वर्तमान समयमा सीमा मिचिएको बेला पुथ्वीनारायण शाहको योगदान स्मरणीय रहेको उल्लेख गर्दै देशको सीमा जोगाउन सबै एकजुट भएर लाग्नुपर्नेमा जोडदिए ।

Facebook Comment


Leave a Reply

Your email address will not be published. Required fields are marked *

सम्बन्धित खवर

ताजा भिडियो

No ads found for this position